വെട്ടത്തൂര്‍: പൂങ്കാവനം ഡാം പരിസര വളവില്‍ അപകടങ്ങള്‍ തുടര്‍ക്കഥയാകുന്നു. ദിവസങ്ങള്‍ക്കു മുമ്പ് പെരിന്തല്‍മണ്ണയില്‍ നിന്നും വെട്ടത്തൂരിലേക്ക് വരികയായിരുന്ന ബൊലീറൊ വാഹനം നിയന്ത്രണം വിട്ട് താഴ്ച്ചയിലേക്ക് മറിഞ്ഞിരുന്നു.യാത്രക്കാര്‍ നിസാര പരുക്കുകളോടെ രക്ഷപെട്ടുവെങ്കിലും മേഖലയില്‍ അപകടങ്ങള്‍ തുടര്‍ക്കഥയാവുകയാണ്. ഒരാഴ്ച്ചക്കിടെ പ്രദേശത്ത് നടക്കുന്ന രണ്ടാമത്തെ അപകടമാണിത്. നേരത്തെ വെട്ടത്തൂര്‍ ഗവ.ഹയര്‍ സെക്കന്‍ഡറി സ്‌കൂളിലെ പത്താം ക്ലാസ് വിദ്യാര്‍ഥി പ്രീമക്ക് ബൈക്ക് ഇടിച്ച് പരുക്കേറ്റിരുന്നു. കാല്‍മുട്ടിനു ഗുരുതര പരുക്കേറ്റ ഇവര്‍ ചികില്‍സ തേടി വരികയാണ്. അപകടങ്ങളെല്ലാം സംഭവിക്കുന്നത് ഒരേ സ്ഥലത്താണ്.
കുത്തനെയുള്ള ഇറക്കത്തിലെ വളവില്‍ അപായ സൂചനാ ബോര്‍ഡുകള്‍ സ്ഥാപിക്കാത്തതും വളവില്‍ കാടുമൂടിയതിനാല്‍ മറുഭാഗത്ത് നിന്നും വരുന്ന വാഹനങ്ങളെയോ കാല്‍നട യാത്രക്കാരെയോ തിരിച്ചറിയാന്‍ സാധിക്കാത്തതുമാണ് ഇവിടെ അപകടങ്ങള്‍ക്ക് കാരണമെന്നാണ് വിലയിരുത്തല്‍. പ്രശ്‌നത്തിനു പരിഹാരമായി സുരക്ഷാ സംവിധാനങ്ങള്‍ ഏര്‍പ്പെടുത്തിയില്ലെങ്കില്‍ വന്‍ ദുരന്തത്തിന് സാക്ഷിയാകേണ്ടി വരുമെന്നാണ് നാട്ടുകാര്‍ മുന്നറിയിപ്പ് നല്‍കുന്നത്.