ബംഗളൂരു: കര്‍ണാടകയിലെ ദര്‍വാഡില്‍ നിര്‍മാണത്തിലിരിക്കുന്ന കെട്ടിടം പൊളിഞ്ഞ് വീണുണ്ടായ അപകടത്തില്‍ രണ്ടു പേര്‍ മരിച്ചു. 50 ഓളം പേര്‍ കുടുങ്ങിക്കിടക്കുന്നതായാണ് റിപ്പോര്‍ട്ട്.

കുമാരേശ്വര നഗറിലാണ് സംഭവം. സ്ഥലത്ത് രക്ഷാപ്രവര്‍ത്തനം പുരോഗമിക്കുന്നു.

കഴിഞ്ഞ രണ്ടു വര്‍ഷമായി പണി നടന്നുകൊണ്ടിരിക്കുന്ന കെട്ടിടമാണ് അപകടത്തില്‍പ്പെട്ടത്. കെട്ടിടത്തിന്റെ മൂന്നാം നിലയുടെ പണി നടക്കുകയായിരുന്നു. ആദ്യ നിലയില്‍ 60 കടകള്‍ പ്രവര്‍ത്തിച്ചുവരികയുമായിരുന്നു. കെട്ടിടം പൊളിഞ്ഞുവീഴുന്ന സമയത്ത് 150 പേരെങ്കിലും സ്ഥലത്ത് ഉണ്ടായിരുന്നതായാണ് നിഗമനം.

രക്ഷാപ്രവര്‍ത്തനത്തിന് നേതൃത്വം നല്‍കാന്‍ ചീഫ് സെക്രട്ടറിയോട് നിര്‍ദേശിച്ചിട്ടുണ്ടെന്ന് മുഖ്യമന്ത്രി എച്ച്.ഡി കുമാരസ്വാമി പ്രതികരിച്ചു. രക്ഷാപ്രവര്‍ത്തനത്തിന് കൂടുതല്‍ സേനയെ വിന്യസിക്കാനും നിര്‍ദേശിച്ചിട്ടുണ്ട്.