അസ്തന: കസാകിസ്താന്‍ പ്രസിഡന്റും കസാക് കമ്യൂണിസ്റ്റ് പാര്‍ട്ടി പ്രഥമ സെക്രട്ടറിയുമായ നൂര്‍ സുല്‍ത്താന്‍ നാസര്‍ ബയേവ് രാജിവച്ചു. ഇന്നലെ നടത്തിയ അസാധാന ടെലിവിഷന്‍ പ്രഭാഷണത്തിനിടെയാണ് 78 കാരനായ നാസര്‍ബയേവ് അപ്രതീക്ഷിതമായി രാജി പ്രഖ്യാപിച്ചത്.
മൂന്നുപതിറ്റാണ്ടോളം നീണ്ട ഏകാധിപത്യഭരണം അവസാനിപ്പിച്ചാണ് 1990ല്‍ സോവിയറ്റ് യൂനിയനില്‍നിന്ന് വിഘടിച്ച് കസാകിസ്താന്‍ രൂപീകരിക്കപ്പെട്ടതു മുതല്‍ രാഷ്ട്രത്തലവനായ നാസര്‍ ബയേവ് പടിയിറങ്ങുന്നത്. പ്രയാസമുള്ള തീരുമാനം കൈക്കൊള്ളുന്നതായും പ്രസിഡന്റ് പദവിയില്‍നിന്നു രാജിവയ്ക്കുന്നതായും പറഞ്ഞ അദ്ദേഹം പക്ഷേ, രാജികാരണത്തെ കുറിച്ചു വിശദീകരിച്ചില്ല. രാജി സംബന്ധിച്ച് കസാക് മാധ്യമങ്ങളിലും പരാമര്‍ശമില്ല. ഈ വര്‍ഷം ഞാന്‍ പ്രസിഡന്റ് പദവിയില്‍ 30 വര്‍ഷം തികയ്ക്കുകയാണ്. സ്വതന്ത്ര കസാക്കിന്റെ സ്ഥാപകന്‍ എന്ന നിലയ്ക്ക് പുതിയ തലമുറയ്ക്ക് സൗകര്യമൊരുക്കുകയാണെന്ന് അദ്ദേഹം പറഞ്ഞു.