ആംസറ്റര്‍ഡാം: നെതര്‍ലന്‍ഡിലെ ഉത്രെക്തില്‍ മൂന്നുപേരുടെ മരണത്തിനിടയാക്കിയ വെടിവയ്പ് നടത്തിയ തുര്‍ക്കി പൗരന്‍ ഗൊകുമാന്‍ തമിന്‍ (37) അറസ്റ്റില്‍. ആക്രമണം നടന്നയുടന്‍ കടന്നുകളഞ്ഞ ഇയാളെ ഇന്നലെ രാവിലെയോടെയാണ് പിടികൂടിയത്.
ഇയാളെ ചോദ്യംചെയ്തുവരികയാണെന്ന് ഡച്ച് പൊലിസ് അറിയിച്ചു.
മധ്യ നെതര്‍ലന്‍ഡ് നഗരമായ ഉത്രെക്തിലെ വൈദ്യുതി ഉപയോഗിച്ച് ഓടുന്ന യാത്രാവണ്ടിയില്‍ (ട്രാം) പ്രാദേശികസമയം തിങ്കളാഴ്ച രാവിലെ 10 മണിയോടെയാണ് സംഭവം.
ആക്രമണത്തെത്തുടര്‍ന്ന് രാജ്യത്തെ സ്‌കൂളുകളും മറ്റു പൊതുകേന്ദ്രങ്ങളും ഇന്നലെ അടച്ചിട്ടിരുന്നു.
അതേസമയം ആക്രമണത്തിനു പിന്നില്‍ ഭീകരബന്ധമുണ്ടോയെന്നും ഇയാള്‍ തനിച്ചാണോ ആക്രമണം നടത്തിയതെന്നും അന്വേഷിക്കുമെന്ന് തുര്‍ക്കി പ്രസിഡന്റ് റജബ് ത്വയ്യിബ് ഉര്‍ദുഗാന്‍ അറിയിച്ചു.