വാഷിങ്ടണ്‍: അമേരിക്കയിലേക്ക് യാത്രചെയ്യുമ്പോള്‍ സൂക്ഷിക്കണമെന്ന മുന്നറിയിപ്പുമായി മൂന്നു രാജ്യങ്ങള്‍. യു.എ.ഇ, ബഹ്‌റൈന്‍, കരീബിയന്‍ രാജ്യമായ ബഹാംസ് എന്നിവയാണ് മുന്നറിയിപ്പ് നല്‍കിയത്. സാധാരണ മറ്റു രാജ്യങ്ങള്‍ പ്രശ്‌നബാധിതമെന്ന് വരുത്തിതീര്‍ത്ത് യു.എസ് സ്വന്തം പൗരന്മാര്‍ക്ക് യാത്രാ മുന്നറിയിപ്പ് നല്‍കുകയല്ലാതെ യു.എസിനെതിരേ ഏതെങ്കിലും രാജ്യം വിലക്ക് പുറപ്പെടുവിക്കുന്നത് അസാധാരണമാണ്.
മധ്യപൗരസ്ത്യ രാജ്യങ്ങളില്‍ സുരക്ഷിതത്വമില്ലെന്ന് കാണിച്ച് പലതവണ യു.എസ് പൗരന്മാര്‍ക്ക് മുന്നറിയിപ്പ് നല്‍കാറുണ്ട്. എന്നാല്‍ ഇപ്പോള്‍ യു.എസിനെതിരേ മുന്നറിയിപ്പ് നല്‍കിയത് മധ്യപൗരസ്ത്യ രാജ്യങ്ങളാണെന്നതും ശ്രദ്ധേയമാണ്. കറുത്ത വര്‍ഗക്കാരെ വെടിവച്ചുകൊന്നതിനെതിരേയുള്ള പ്രതിഷേധത്തിന്റെ പശ്ചാത്തലത്തില്‍ യു.എസിലേക്ക് പോകുന്നത് സൂക്ഷിക്കണമെന്നാണ് യു.എസിലെ ബഹ്‌റൈന്‍ എംബസിയുടെ മുന്നറിയിപ്പ്.
യു.എസിലെ പൊലിസുമായി യുവാക്കള്‍ ഇടപെടുമ്പോള്‍ സൂക്ഷിക്കണമെന്നാണ് ആഫ്രിക്കന്‍ രാജ്യമായ ബഹാംസിലെ വിദേശകാര്യമന്ത്രാലയം അറിയിച്ചത്. യു.എസിലുള്ള വിദ്യാര്‍ഥികളും പൗരന്മാരും ജാഗ്രതപാലിക്കണമെന്ന് യു.എ.ഇയും മുന്നറിയിപ്പ് നല്‍കി. ഐ.എസ് ബന്ധം ആരോപിച്ച് യു.എ.ഇ പൗരനെ യു.എസില്‍ പൊലിസ് കസ്റ്റഡിയിലെടുത്തിരുന്നു.