പാലക്കാട് : വസ്ത്ര വ്യാപാര രംഗത്ത് ഏറെ പ്രശസ്തരായ നെടുങ്ങാടി സാരി സില്‍ക്‌സ് യാതൊരു മുന്നറിയിപ്പുമില്ലാതെ സ്ഥാപനം അടച്ചുപൂട്ടിയതിനെ തുടര്‍ന്ന് 60 തൊഴിലാളികളും അവരുടെ കുടുംബങ്ങളും പെരുവഴിയിലായി. പാലക്കാട് വിക്ടോറിയ കോളജ് റോഡില്‍ സി.പി.എം ജില്ലാ കമ്മിറ്റി ഓഫീസിന് സമീപം പ്രവര്‍ത്തിക്കുന്ന സാരി സെന്ററാണ് ഏതാനും ദിവസം മുമ്പ് അടച്ചുപൂട്ടിയത്. കുറച്ചുനാളുകളായി സാരി സെന്ററിലേക്ക് പുതിയ സ്റ്റോക്കുകളൊന്നും എത്തിച്ചിരുന്നില്ല. ഉള്ള സ്‌റ്റോക്കുകള്‍ വിറ്റഴിക്കുക മാത്രമാണ് ചെയ്തിരുന്നത്. സ്‌റ്റോക്ക് ക്ലിയറന്‍സ് ആണെന്നാണ് മാനേജ്‌മെന്റ് ജീവനക്കാരോട് പറഞ്ഞിരുന്നത്. എന്നാല്‍ സ്റ്റോക്ക് ഏതാണ്ട് തീര്‍ന്നതോടെ പെട്ടെന്ന് സ്ഥാപനം അടച്ചുപൂട്ടുകയായിരുന്നു. സാമ്പത്തിക പ്രതിസന്ധി കാരണം സാരി സെന്റര്‍ താല്‍ക്കാലികമായി അടച്ചുപൂട്ടുന്നുവെന്ന് കാണിച്ച് മാനേജ്‌മെന്റ് സ്ഥാപനത്തിനുമുന്നില്‍ ബാനറും വെച്ചിട്ടുണ്ട്. അതേസമയം വ്യാപാര സ്ഥാപനം അടച്ചുപൂട്ടുന്ന ഘട്ടങ്ങളില്‍ പാലിക്കേണ്ട യാതൊരു നിയമാനുസൃത നടപടിയും പാലിക്കാതെയാണ് നെടുങ്ങാടി സാരി സെന്റര്‍ അടച്ചുപൂട്ടിയതെന്ന് ജീവനക്കാര്‍ പറയുന്നു. 60 ജീവനക്കാരാണ് സ്ഥാപനത്തില്‍ ഉള്ളത്. ഇവരെ ഒഴിവാക്കി കുറഞ്ഞ ശമ്പളത്തിന് പുതിയ ആളുകളെ നിയമിക്കാനുള്ള മാനേജ്‌മെന്റിന്റെ അടവാണ് ഇപ്പോഴത്തെ അടച്ചുപൂട്ടലിനു പിന്നിലെന്ന് ജീവനക്കാര്‍ കുറ്റപ്പെടുത്തുന്നു.
അടച്ചുപൂട്ടിയ സാരി സെന്റര്‍ വീണ്ടും തുറന്നുപ്രവര്‍ത്തിക്കണമെന്നാവശ്യപ്പെട്ട് സ്ത്രീജീവനക്കാര്‍ ഉള്‍പ്പടെ 60 ആളുകളും പകല്‍ മുഴുവന്‍ സ്ഥാപനത്തിനു മുന്നില്‍ കുത്തിയിരിപ്പ് സമരത്തിലാണ്. അതേസമയം 60 തൊഴിലാളികളും അവരുടെ കുടുംബാംഗങ്ങളും പട്ടിണിയിലാകുന്ന ഘട്ടത്തിലും തങ്ങളുടെ ന്യായമായ സമരത്തെ മാധ്യമങ്ങള്‍ കണ്ടില്ലെന്ന് നടിക്കുന്നത് ഖേദകരമാണെന്ന് ജീവനക്കാര്‍ കുറ്റപ്പെടുത്തി. മാനേജ്‌മെന്റിനെ പിണക്കാന്‍ വയ്യാത്തതുകൊണ്ടാണ് തങ്ങളുടെ സമരത്തെ മാധ്യമങ്ങള്‍ കണ്ടില്ലെന്ന് നടിക്കുന്നതെന്നും അവര്‍ പറഞ്ഞു.
ജില്ലാ ലേബര്‍ ഓഫിസര്‍ക്ക് ജീവനക്കാര്‍ പരാതി നല്‍കിയിട്ടുണ്ട്. ലേബര്‍ ഓഫിസറുടെ ഇടപെടലില്‍ തങ്ങള്‍ക്ക് പ്രതീക്ഷയും വിശ്വാസവും ഉണ്ടെന്നും ജീവനക്കാര്‍ വ്യക്തമാക്കുന്നു.