കരിന്തളം: ആരോഗ്യമേഖലയില്‍ ജില്ലയ്ക്കു മുന്‍ഗണന നല്‍കി നിയമനം നടത്തുമെന്ന് ആരോഗ്യമന്ത്രി കെ.കെ ശൈലജ. കരിന്തളം കോയിത്തട്ടയില്‍ നടന്ന ബഡ്‌സ് റിഹാബിലിറ്റേഷന്‍ സെന്റര്‍ ഉദ്ഘാടനവും കരിന്തളം പി.എച്ച്.സി കുടുംബാരോഗ്യ കേന്ദ്രമാക്കി മാറ്റിയതിന്റെ പ്രഖ്യാപനവും നിര്‍വഹിക്കുകയായിരുന്നു മന്ത്രി.
എന്‍ഡോസള്‍ഫാന്‍ ദുരിത ബാധിതര്‍ക്കായി ആയുര്‍വേദ ചികിത്സാ വിഭാഗം നടപ്പാക്കുന്ന സാന്ത്വനം പദ്ധതിയുടെ ജില്ലാതല പ്രഖ്യാപനവും ഫ്‌ളാഗ്  ഓഫും മന്ത്രി നടത്തി. റവന്യൂമന്ത്രി ഇ ചന്ദ്രശേഖരന്‍ അധ്യക്ഷനായി. ബഡ്‌സ് റിഹാബിലിറ്റേഷന്‍ സെന്ററിനാവശ്യമായ ആധുനിക സജ്ജീകരണങ്ങളോടു കൂടിയ വാഹനം വാങ്ങാനുള്ള തുക എം.പി ഫണ്ടില്‍ നിന്ന് അനുവദിക്കുമെന്നു മുഖ്യാതിഥിയായിരുന്ന പി കരുണാകരന്‍ എം.പി പ്രഖ്യാപിച്ചു.
പരപ്പ ബ്ലോക് പഞ്ചായത്ത് പ്രസിഡന്റ് പി രാജന്‍, ജില്ലാ പഞ്ചായത്ത് അംഗം ജോസ് പതാല്‍, കിനാനൂര്‍ കരിന്തളം പഞ്ചായത്ത് പ്രസിഡന്റ് എ വിധുബാല, വൈസ് പ്രസിഡന്റ് വി ബാലകൃഷ്ണന്‍, മറ്റു ജനപ്രതിനിധികള്‍, വിവിധ രാഷ്ട്രീയ കക്ഷി നേതാക്കള്‍, ആരോഗ്യ വകുപ്പ് ജീവനക്കാര്‍ തുടങ്ങിയവര്‍ സംസാരിച്ചു.
കാഞ്ഞങ്ങാട്:  പ്രാഥമികാരോഗ്യ കേന്ദ്രങ്ങളെ ആധുനിക ചികിത്സ ലഭിക്കുന്ന സമഗ്ര കുടുംബാരോഗ്യകേന്ദ്രമാക്കി മാറ്റുകയെന്നതാണ് സര്‍ക്കാറിന്റെ ലക്ഷ്യമെന്ന് മന്ത്രി കെ.കെ ശൈലജ. കാഞ്ഞങ്ങാട് ജില്ലാ ആശുപത്രിയില്‍ ഡയാലിസിസ് യൂനിറ്റ് ഉദ്ഘാടനം ചെയ്യുകയായിരുന്നു മന്ത്രി.
ജില്ലാ ആശുപത്രിക്കു ഉടന്‍ തന്നെ ഹൃദ്രോഗ ചികിത്സക്കായുള്ള കാത്തലാബ് സൗകര്യവും ഉടന്‍ ഏര്‍പ്പെടുത്തുമെന്നും മന്ത്രി കൂട്ടിച്ചേര്‍ത്തു.
തടവുകാര്‍ക്കുള്ള പ്രത്യേക ബ്‌ളോക്ക് പി കരുണാകരന്‍ എം.പിയും മാമോഗ്രാം യൂനിറ്റ് മന്ത്രി ഇ ചന്ദ്രശേഖരനും ഉദ്ഘാടനം ചെയ്തു. കെ കുഞ്ഞിരാമന്‍ എം.എല്‍.എ, ഡോ. രാമചന്ദ്രന്‍, ഹക്കീം കുന്നില്‍, ഡോ. സുനന്ദ നന്ദന്‍, ഡോ. എ.പി ദിനേശ്കുമാര്‍ സംസാരിച്ചു.