മണ്ണാര്‍ക്കാട്: അവധി ദിവസങ്ങളിലും മറ്റും മുക്കാലി ചുരവും അട്ടപാടി മേഖലയും കാണാനെത്തുന്നവര്‍ അടിസ്ഥാന സൗകര്യമില്ലത്തത് മുലം ദുരിതത്തിലകുന്നു. എണ്‍പത് കോടി രൂപ ഉപയോഗിച്ച് നടത്താന്‍ പോകുന്ന റോഡ് വികസന പ്രവര്‍ത്തനത്തിനൊപ്പം ചുരം കാണാനെത്തുന്ന സഞ്ചാരികളെ ആകര്‍ഷിക്കുന്നത്തിനുള്ള സംവിധാനങ്ങളും ഒരുക്കണം.
അവധി ദിവസങ്ങളിലും ഹര്‍ത്താല്‍ ദിനങ്ങളിലും അയല്‍ജില്ലകളില്‍നിന്ന് പോലും നൂറുകണക്കിനാളുകളാണ് ചുരത്തിലത്തുന്നത്. നിരവധി കുടുംബങ്ങളും എത്തുന്നുണ്ട്. തിങ്ങിനിറഞ്ഞ കാനന ഭംഗി കണ്ടുകൊണ്ടുള്ള യാത്രയും താരതമ്യേന അപകടരഹിതമായ യാത്രയുമാണ് ആളുകളെ ആകര്‍ഷിക്കുന്നത്. എന്നാല്‍ ചുരത്തിലുടെ കടന്നുപോകുന്ന യാത്രക്കാര്‍ക്ക് ചുരത്തിന്റെ ഭംഗി കാണാനോ താഴ്‌വരയുടെ ഭംഗി ആസ്വദിക്കാനോ സൗകാര്യമില്ല. നിലവിലുള്ള വ്യൂ പൊയന്റുകളെല്ലാം തകര്‍ന്ന കിടക്കുകയാണ്. മാത്രമല്ല സഞ്ചാരികള്‍ക്ക് ഇടത്താവളമാകുന്ന സ്ഥലങ്ങളിലൊന്നും തന്നെ വിശ്രമിക്കാന്‍ സൗകര്യമില്ല. ഇടതൂര്‍ന്ന വനവും കൂറ്റന്‍ മരങ്ങളും തന്നെയാണ് അട്ടപ്പാടി ചുരത്തിന്റെ ആകര്‍ഷണം. റോഡ് വികസനം നടക്കുമ്പോള്‍ കൂടെ വിനോദ സഞ്ചാരികളെ ആകര്‍ഷിക്കുന്ന തരത്തിലുള്ള അടിസ്ഥാന സൗകര്യങ്ങള്‍ കൂടി ഒരുക്കണമെന്ന ആവശ്യം ശക്തമാണ്.