സുല്‍ത്താന്‍ ബത്തേരി: മുത്തങ്ങ എക്‌സൈസ് ചെക് പോസ്റ്റിലും കല്ലൂരിലുമായി നടന്ന പരിശോധനകളില്‍ ഏഴുകിലോ കഞ്ചാവ് പിടികൂടി. ഇരു കേസിലുമായി മൂന്ന് യുവാക്കള്‍ എക്‌സൈസിന്റെ പിടിയിലായി. വെള്ളിയാഴ്ച്ച രാത്രി വാഹന പരിശോധനയ്ക്കിടെ മുത്തങ്ങ എക്‌സൈസ് ചെക് പോസ്റ്റില്‍ കാറില്‍ കടത്തുകയായിരുന്ന ആറു കിലോ കഞ്ചാവാണ് പിടികൂടിയത്. മലപ്പുറം തിരൂര്‍ സ്വദേശികളായ സുജിഷ് (25), സനല്‍ (25) എന്നിവരാണ് പിടിയിലായത്. കാറിന്റെ ബമ്പറിനടിയില്‍ ഒളിപ്പിച്ച നിലയിലായിരുന്നു കഞ്ചാവ്. ബംഗളുരൂവില്‍ നിന്ന് കോഴിക്കോട്ടേക്കാണ് കഞ്ചാവ് വില്‍പ്പനക്കായി കൊണ്ടു പോകുന്നതെന്ന് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ടി.എം മജു പറഞ്ഞു.
വെള്ളിയാഴ്ച്ച രാത്രി കല്ലൂര്‍ 67ലെ ബസ് കാത്തിരിപ്പുകേന്ദ്രത്തില്‍ വച്ചാണ് ഒരുകിലോ 200ഗ്രാം കഞ്ചാവുമായി മലപ്പുറം തിരൂര്‍ മംഗലം ചാഞ്ചാട്ട് വിട്ടില്‍ ഫറൂഖിനെ (26) എക്‌സൈസ് സംഘം അറസ്റ്റ് ചെയ്തത്. കര്‍ണാടകത്തില്‍ നിന്ന് കഞ്ചാവുമായെത്തി മുത്തങ്ങ എക്‌സൈസ് ചെക് പോസ്റ്റിനപ്പുറം വാഹനമിറങ്ങി വനത്തിലൂടെ നടന്ന് കല്ലൂരില്‍ എത്തിയതാവാമെന്നാണ് എക്‌സൈസ് നിഗമനം. പ്രതികളെ കോടതിയില്‍ ഹാജരാക്കി.