തിരുവനന്തപുരം: ഓണ്‍ലൈന്‍ ക്ലാസെടുത്ത അധ്യാപകരെ സമൂഹ മാധ്യമങ്ങളില്‍ അപമാനിച്ചവര്‍ക്കെതിരെ വ്യാപക പ്രതിഷേധം. അധ്യാപികമാര്‍ക്കെതിരെ ലൈംഗികചുവയോടെയുള്ള ട്രോളുകളും പോസ്റ്ററുകളും കമന്റുകളും പ്രചരിപ്പിച്ചവര്‍ക്കെതിരെയാണ് സമൂഹമാധ്യമങ്ങളില്‍ ഉള്‍പ്പെടെ പ്രതിഷേധം നിറയുന്നത്. ഇവര്‍ക്കെതിരെ പ്രതിഷേധം തുടരുമ്പോള്‍ തന്നെ അധ്യാപികമാര്‍ക്ക് അഭിനന്ദനപ്രവാഹമാണ് സമൂഹമാധ്യമങ്ങളില്‍ നിറയെ.
പൂച്ചക്കുട്ടികളുടെയും കുരങ്ങന്റെയും കഥയുമായി ഓണ്‍ലൈന്‍ ക്ലാസെടുത്ത സായി ശ്വേത എന്ന അധ്യാപികയ്‌ക്കെതിരെയാണ് ആദ്യം സമൂഹമാധ്യമങ്ങളില്‍ ആക്രമണമുണ്ടായത്.
ആദ്യമൊക്കെ ട്രോളുകളിലൂടെയാണ് സായി ടീച്ചര്‍ സൈബര്‍ ഇടങ്ങളില്‍ നിറഞ്ഞുനിന്നതെങ്കിലും പിന്നീട് ചില മോശം ട്രോളുകളും അശ്ലീല കമന്റുകളും പ്രത്യക്ഷപ്പെട്ടു. പിന്നീട് അധ്യാപികമാര്‍ ക്ലാസുകള്‍ എടുക്കുന്ന വിഡിയോ എഡിറ്റുചെയ്തും ടിക് ടോക്ക് വിഡിയോ ഇറക്കിയും ചിലര്‍ ആഘോഷിച്ചു. ഇവരുടെ ക്ലാസുകളെ അവഹേളിക്കുന്ന വിഡിയോകളും ട്രോളുകളും സമൂഹമാധ്യമങ്ങളില്‍ നിറയുകയായിരുന്നു.
എന്നാല്‍ ഒന്നാംക്ലാസുകാര്‍ക്കുള്ള ക്ലാസുകളാണിതെന്നും സ്‌കൂളുകളെ കുറിച്ചും ക്ലാസുകളെ കുറിച്ചും അധ്യയന രീതികളെക്കുറിച്ചും അറിവില്ലാത്തവരാണ് ടീച്ചര്‍മാരെ കളിയാക്കുന്നതെന്നും ചൂണ്ടിക്കാട്ടി ഒരു വിഭാഗം രംഗത്തെത്തി. സായി ശ്വേത ടീച്ചറുടെ ക്ലാസുകള്‍ പൂര്‍ണമായും ആസ്വദിക്കുന്ന കുട്ടികളുടെ വിഡിയോകളും ചിലര്‍ ഷെയര്‍ ചെയ്തു. ഇതോടെ അധിക്ഷേപിച്ചവരെ എതിര്‍ത്തും ടീച്ചര്‍മാരെ പിന്തുണച്ചും പൊതുസമൂഹം ഒന്നടങ്കം രംഗത്തെത്തുകയായിരുന്നു.