ചേര്‍ത്തല : ദുരൂഹ സാഹചര്യത്തില്‍ കാണാതായ ,കോടികളുടെ സ്വത്തിന് ഉടമയായ കടക്കരപ്പള്ളി സ്വദേശിനി ബിന്ദു പത്മനാഭന്റെ തിരോധാനവും, വ്യാജരേഖ ചമച്ച് സ്വത്തുക്കള്‍ തട്ടിയെടുത്തതുമായ കേസുകളുടെ അന്വേഷണ പുരോഗതി വിലയിരുത്താന്‍ ഞായറാഴ്ച ഡി.ജി.പി എത്തും.
ആലപ്പുഴയില്‍ പൊലിസ് സ്റ്റേഷന്റെ ഉദ്ഘാടനവുമായി ബന്ധപ്പെട്ട് എത്തുന്ന ഡി.ജി.പി ലോക്‌നാഥ് ബെഹ്‌റ ഇതുവരെയുള്ള അന്വേഷണം വിലയിരുത്തും.
കൊച്ചി റേഞ്ച് ഡി.ഐ.ജി വിജയ് എസ്.ശാഖ്‌രേ ഉള്‍പ്പെടെയുള്ള ഉന്നത ഉദ്യോഗസ്ഥരും പങ്കെടുക്കും. ഇതിന് മുന്നോടിയായി ശനിയാഴ്ച കൊച്ചി റേഞ്ച് ഓഫിസില്‍ ഡി.ഐ.ജിയുടെ സാന്നിധ്യത്തില്‍ കേസിലെ അന്വേഷണ ഉദ്യോഗസ്ഥരായ ഡി.വൈ.എസ്.പിമാരായ എ.ജി.ലാല്‍, എം.നിസാം എന്നിവരുടെ യോഗം നടന്നു.
വ്യാജ രേഖ ചമച്ച കേസിലെ മൂന്നും നാലും പ്രതികളെ നേരത്തെ അറസ്റ്റ് ചെയ്തിരുന്നെങ്കിലും മുഖ്യപ്രതിയും ആള്‍മാറാട്ടം നടത്തിയ പ്രതികളും ഒളിവിലാണ്. ഇവരുടെ മൊഴികള്‍ പൊലീസ് രേഖപ്പെടുത്തിയപ്പോള്‍ അറസ്റ്റ് ചെയ്യാതിരുന്നതും വിമര്‍ശനത്തിന് കാരണമായി.
ബിന്ദുവിന്റെ തിരോധാനവുമായി ബന്ധപ്പെട്ട് സഹോദരന്‍ പ്രവീണ്‍ കുമാര്‍ നല്‍കിയ പരാതിയില്‍ ഇവരുടെ പങ്കിനെ സംബന്ധിച്ച് തെളിവുകള്‍ സഹിതം വിവരങ്ങള്‍ നല്‍കിയിരുന്നതിനാല്‍ അന്വേഷണത്തില്‍ ജാഗ്രത കാട്ടിയിരുന്നെങ്കില്‍ ഇവരെ ആദ്യമേ അറസ്റ്റ് ചെയ്യാമായിരുന്നുവെന്ന് ആക്ഷേപമുണ്ട്.
ആള്‍മാറാട്ടം നടത്തിയതായി പൊലീസ് കണ്ടെത്തിയ കേസിലെ രണ്ടാം പ്രതി മിനി, ചോദ്യം ചെയ്യുന്നതിന് കഴിഞ്ഞ ദിവസം പൊലിസ് വിളിപ്പിച്ചതിന് ജീവനൊടുക്കിയ ഓട്ടോ ഡ്രൈവര്‍ ഉള്‍പ്പെടെയുള്ളവരുടെ മുഴുവന്‍ വിവരങ്ങളും പ്രവീണിന്റെ ആദ്യ പരാതിയില്‍ തന്നെ ഉണ്ടായിരുന്നു. കേസിലെ മുഖ്യപ്രതി സെബാസ്റ്റ്യനെ ചോദ്യം ചെയ്താല്‍ മാത്രമേ ബിന്ദുവിനെ കുറിച്ച് എന്തെങ്കിലും വിവരം ലഭിക്കൂവെന്നതാണ് ഇപ്പോഴത്തെ അവസ്ഥ.
പൊലീസിന്റെ നേതൃത്വത്തില്‍ തമിഴ്‌നാട്ടിലും കര്‍ണാടകയിലും വ്യാപക തിരച്ചില്‍ നടത്തിയിട്ടും യാതൊരു സൂചനയും ലഭിച്ചിട്ടില്ല. വ്യാജ മുക്ത്യാറിലെ വിരലടയാളം ആള്‍മാറാട്ടം നടത്തിയയാളുടേത് അല്ലെന്ന സൂചനയും പൊലീസിനെ വലയ്ക്കുകയാണ്.
ഇതിലെ വിരലടയാളം ആരുടേതാണെന്ന് കണ്ടെത്തിയില്ലെങ്കില്‍ പ്രതിക്ക് രക്ഷപ്പെടാനുള്ള സാഹചര്യമുണ്ടാകുമെന്നും കരുതുന്നു. ഇതിന് മുക്ത്യാര്‍ റജിസ്റ്റര്‍ ചെയ്ത സബ് റജിസ്ട്രാര്‍ ഓഫിസിലെ ജീവനക്കാരെ കൂടി പ്രതിപട്ടികയില്‍ ഉള്‍പ്പെടുത്തി ചോദ്യം ചെയ്യുവാനാണ് പൊലീസിന്റെ നീക്കം.അതേസമയം കേസിലെ മുഖ്യപ്രതി പള്ളിപ്പുറം സ്വദേശി സെബാസ്റ്റ്യനും രണ്ടാം പ്രതി മിനിയും ജില്ലാ കോടതിയില്‍ നല്‍കിയ മുന്‍കൂര്‍ ജാമ്യാപേക്ഷയില്‍ വിധി പറയാന്‍ തിങ്കളാഴ്ചത്തേക്ക് മാറ്റി.