ചാലിയം: ചാലിയം ഫോറസ്റ്റ് ഡിപ്പോക്കു മുന്നില്‍അറവുമാലിന്യം നിറച്ചെത്തിയ മിനിലോറി നാട്ടുകാര്‍ തടഞ്ഞുവച്ചു. ഫറോക്ക് ചുങ്കം ഭാഗത്തുനിന്ന് ശേഖരിച്ച അറവുമാലിന്യമാണ് ഇവിടേക്കെത്തിച്ചത്. പാലക്കാട് പന്നിഫാമിലേക്കുള്ളതാണെന്നായിരുന്നു നാട്ടുകാരോട് ആദ്യം പറഞ്ഞത്. എന്നാല്‍ കണ്‍ട്രോള്‍ റൂം പൊലിസെത്തി ലോറി ജീവനക്കാരെ ചോദ്യം ചെയ്തപ്പോള്‍ കാസര്‍കോടിലെ കര്‍ണാടക ബോര്‍ഡറിലുള്ള ഒരു കമ്പനിയിലേക്കാണെന്നു മാറ്റിപ്പറയുകയായിരുന്നു.
പരസ്പര വിരുദ്ധമായി കാര്യങ്ങള്‍ പറയുന്നതിലും ഫറോക്കില്‍നിന്നു ചാലിയം ഭാഗത്തേക്കു വാഹനം എന്തിനുവന്നു എന്നതിലും ദുരൂഹതയുണ്ടെന്ന് നാട്ടുകാര്‍ പറയുന്നു. ചാലിയം ഫോറസ്റ്റ് മേഖലകളില്‍ അറവുമാലിന്യം തള്ളുന്നത് പതിവായതിനെ തുടര്‍ന്ന് നാട്ടുകാര്‍ നിരീക്ഷിച്ചുവരുന്നതിനിടയിലാണ് ഈ വാഹനം പിടികൂടിയത്. കടലുണ്ടി ഗ്രാമ പഞ്ചായത്ത് അധികൃതരും ഹെല്‍ത്ത് ഡിപ്പാര്‍ട്ട്‌മെന്റ് ജീവനക്കാരും സ്ഥലത്തെത്തിയിരുന്നു. വാഹനം പൊലിസ് കസ്റ്റഡിയിലെടുത്തു.