വിശാഖപട്ടണം: ആന്ധ്രാപ്രദേശിലെ വിശാഖപട്ടണത്ത് കഴിഞ്ഞ മാസമുണ്ടായ വിഷവാതക ചോര്‍ച്ചയുടെ പൂര്‍ണ ഉത്തരവാദിത്വം എല്‍.ജി പോളിമര്‍ ഇന്ത്യ കമ്പനിക്കാണെന്ന് ദേശീയ ഹരിത ട്രൈബ്യൂണല്‍. സംഭവത്തില്‍ കമ്പനി 50 കോടി രൂപ പിഴയൊടുക്കണമെന്ന വിധി പുനഃപരിശോധിക്കണമെന്ന കമ്പനിയുടെ ആവശ്യം ട്രൈബ്യൂണല്‍ തള്ളി.

മെയ് ഏഴിനായിരുന്നു വിശാഖപട്ടണത്തെ പ്ലാന്റില്‍നിന്നു വിഷവാതക ചോര്‍ച്ചയുണ്ടായത്. സംഭവത്തില്‍ കുട്ടികളടക്കം 11 പേര്‍ മരിക്കുകയും അഞ്ചിലേറെ ഗ്രാമങ്ങളെ ബാധിക്കുകയും ചെയ്തിരുന്നു. വിഷവാതക ദുരന്തത്തിലെ ഇരകള്‍ക്കു നഷ്ടപരിഹാരമായി നല്‍കാന്‍ 50 കോടി രൂപ കൈമാറാന്‍ ട്രൈബ്യൂണല്‍ കമ്പനിയോട് ആവശ്യപ്പെട്ടു.