മനാമ: ബഹ്‌റൈനിലെ ഇന്ത്യന്‍ സ്‌കൂളില്‍ സമയമാറ്റവുമായി ബന്ധപ്പെട്ടുയര്‍ന്ന ആരോപണങ്ങള്‍ സ്‌കൂളിനെ തകര്‍ക്കാനുള്ള നീക്കമാണെന്നും ആരോപകര്‍ക്കുള്ളത് ദുഷ്ടലാക്കാണെന്നും സ്‌കൂള്‍ ഭാരവാഹികള്‍ വാര്‍ത്താ സമ്മേളനത്തില്‍ ആരോപിച്ചു.

പാഠ്യ- പാഠ്യേതര രംഗത്ത് ചരിത്രത്തിലെ ഏറ്റവും മികച്ച നേട്ടങ്ങളുമായി മുന്നോട്ടുപോകുമ്പോള്‍ രക്ഷിതാക്കള്‍ എന്നപേരില്‍ ദുഷ്ടലാക്കോടെയുള്ള ആരോപണങ്ങളാണ് ചിലര്‍ ഉന്നയിക്കുന്നതെന്ന് വാര്‍ത്താ സമ്മേളനത്തോടൊപ്പം പുറത്തിറക്കിയ വാര്‍ത്താകുറിപ്പിലും മാനേജ്‌മെന്റ് വ്യക്തമാക്കി.

റമദാന്‍ കാലയളവില്‍ കഠിനമായ ഉച്ച വെയിലില്‍ നിന്ന് കുട്ടികളെ രക്ഷിക്കാന്‍ രക്ഷിതാക്കളുടെ അഭ്യര്‍ഥന പ്രകാരമാണ് സ്‌കൂള്‍ സമയക്രമം മാറ്റിയത്. എന്നാല്‍ ഇതിനെതിരെ ചിലര്‍ വ്യാപകമായി ദുശ്പ്രചാരണം നടത്തി.

മുന്‍ വര്‍ഷങ്ങളിലും ഇത്തരം ക്രമീകരണങ്ങള്‍ സ്‌കൂളില്‍ ഏര്‍പ്പെടുത്തിയിട്ടുണ്ട്. അതോടൊപ്പം ഭരണ സമിതി അംഗങ്ങള്‍ക്ക് എതിരെ, അധ്യാപിക-അധ്യാപകന്മാര്‍ക്ക് എതിരെ എല്ലാം വ്യാപകമായ ദുശ്പ്രചാരണമാണ് ഇക്കൂട്ടര്‍ നടത്തുന്നത്.

ഇത്തരക്കാര്‍ക്കെതിരെ സ്‌കൂളിന്റെ ജനറല്‍ ബോഡി മുന്‍പ് തീരുമാനിച്ചിട്ടുള്ളത് പോലെ നിയമ നടപടി ഉള്‍പ്പെടെയുള്ള കാര്യങ്ങളിലേക്ക് നീങ്ങുവാന്‍ ഭരണസമിതി നിര്‍ബന്ധിതമാകുമെന്നും ഭാരവാഹികള്‍ മുന്നറിയിപ്പ് നല്‍കി.

ജിസിസിയിലെ തന്നെ ഏറ്റവും ഉയര്‍ന്ന നിലവാരം പുലര്‍ത്തുന്ന ഇന്ത്യന്‍ സ്‌കൂളിനെ ഇല്ലാതാക്കുക എന്ന ലക്ഷ്യം ആരോപണങ്ങള്‍ക്ക് പിന്നിലുണ്ടെന്ന് സംശയിക്കുന്നതായും മാനേജ്‌മെന്റ് ഭാരവാഹികള്‍ വാര്‍ത്താസമ്മേളനത്തില്‍ ആരോപിച്ചു.

കഴിഞ്ഞ തിരഞ്ഞെടുപ്പില്‍ വലിയ ഭൂരിപക്ഷത്തോടെ രക്ഷിതാക്കള്‍ തള്ളിക്കളഞ്ഞ ഇക്കൂട്ടര്‍ അതിന്റെ വൈരാഗ്യം കുട്ടികളോട് തീര്‍ക്കുകയാണോ എന്ന് തോന്നിപ്പോകുന്ന രീതിയിലാണ് ഇവരുടെ നിലപാടുകള്‍.

ഇന്ത്യന്‍ സ്‌കൂള്‍ സ്ഥാപിതമായതിന്റെ 70-ാം വര്‍ഷികാഘോഷ പ്രവര്‍ത്തനങ്ങള്‍ അടുത്തവര്‍ഷം വിപുലമായ പരിപാടികളോടെ സംഘടിപ്പിക്കാന്‍ തീരുമാനിച്ചതായും ഇതിനായി മുഹമ്മദ് മാലിം കണ്‍വീനറായ കമ്മറ്റിയെ ചുമതലപ്പെടുത്തിയതായും ഭാരവാഹികള്‍ വ്യക്തമാക്കി. സ്‌കൂള്‍ ഭരണസമിതിയുടെ സ്ഥാനാരോഹണം സെപ്തംബറില്‍ നടക്കുമെന്നും ഭാരവാഹികള്‍ അറിയിച്ചു.

സ്‌കൂള്‍ ചെയര്‍മാന്‍ പ്രിന്‍സ് നടരാജന്‍, സെക്രട്ടറി സജി ആന്റണി, പ്രിന്‍സിപ്പല്‍ വി.ആര്‍ പളനിസ്വാമി , റിഫ പ്രിന്‍സിപ്പല്‍ പമേല സേവ്യര്‍, ഖുര്‍ഷിദ് ആലം, ബിനു മണ്ണില്‍, രാജേഷ് നമ്പ്യാര്‍, എന്‍.എസ് പ്രേമലത, വൈസ് പ്രിന്‍സിപ്പല്‍മാരായ വിനോദ്, സതീഷ് എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.