വാഷിങ്ടണ്‍: യു.എസില്‍ വര്‍ഷങ്ങളായി തുടരുന്നു വംശവെറിയുടെ അവസാനത്തെ ഇരയായ ജോര്‍ജ് ഫ്‌ളോയിഡിന് നീതി ലഭിക്കണമെന്നാവശ്യപ്പെട്ട് രാജ്യത്ത് പ്രതിഷേധം കത്തിജ്വലിക്കുമ്പോള്‍ ഫ്‌ളോയിഡിന്റെ ആറുവയസ്സുകാരിയായ മകളുടെ വിഡിയോ സമൂഹമാധ്യമങ്ങളില്‍ വൈറലാകുന്നു.  

മുന്‍ അമേരിക്കന്‍ ബാസ്‌ക്കറ്റ് ബോള്‍ താരവും ജോര്‍ജ് ഫ്‌ളോയിഡിന്റെ സൂഹൃത്തുമായ സ്റ്റീഫന്‍ ജാക്‌സണിന്റെ തോളില്‍ ഇരുന്ന് ഫ്‌ളോയിഡിന്റെ മകള്‍ ജിയാന്ന 'ഡാഡി ചേയ്ഞ്ചിഡ് ദ വേള്‍ഡ്' എന്ന് പറയുന്ന വിഡിയോ ആണ്  വൈറലാകുന്നത്.  അതെ ശരിയാണ് ഗിഗിയുടെ പിതാവ് ലോകത്തെ മാറ്റി,  മാറ്റത്തിന്റെ പേരാണ് ജോര്‍ജ് ഫ്‌ളോയിഡ് എന്ന കുറിപ്പോടെയാണ് ജാക്‌സണ്‍ ഇന്‍സ്റ്റാഗ്രാമില്‍ വിഡിയോ പങ്കുവച്ചത്. 

പതിനായിരക്കണക്കിന് പേരാണ് ഇതിനകം വിഡിയോ കണ്ടത്. ഫ്‌ളോയിഡിന്റെ വധത്തിനെതിരേയുള്ള പ്രതിഷേധത്തിന് പിന്തുണയായി നിരവധിപേരാണ് രംഗത്തെത്തുന്നത്.  

പ്രസിഡന്റ് ഡൊണാള്‍ഡ് ട്രംപിന്റെ മകള്‍ ടിഫാനി ട്രംപും ജനകീയ പ്രതിഷേധങ്ങളെ പിന്തുണച്ച് രംഗത്തെത്തി.