കൊച്ചി: ഇന്ത്യയിലെ ക്രെഡിറ്റ് കാര്‍ഡ് ഉപഭോക്താക്കളില്‍ 92 ശതമാനത്തോളംപേര്‍ തങ്ങളുടെ പ്രതിമാസ ക്രെഡിറ്റ് കാര്‍ഡ് ബില്‍ നല്‍കുമ്പോള്‍ നല്‍കേണ്ട കുറഞ്ഞ തുകയേക്കാള്‍ കൂടുതല്‍ അടക്കുന്ന ശീലമുള്ളവരാണെന്ന് പഠനം.

ട്രാന്‍സ് യൂനിയന്‍ സിബില്‍ ഇന്ത്യ നടത്തിയ പഠനത്തില്‍ ക്രെഡിറ്റ് കാര്‍ഡ് ബില്ലുകള്‍ കൃത്യമായി തിരിച്ചടക്കാതിരുന്നാല്‍ ഉണ്ടാകാവുന്ന പ്രശ്‌നങ്ങളെകുറിച്ചും അതു സിബില്‍ സ്‌ക്കോറുകളെ ബാധിക്കുന്നതിനെക്കുറിച്ചും ഇന്ത്യയിലെ പത്തില്‍ ഒന്‍പതു ക്രെഡിറ്റ് കാര്‍ഡ് ഉടമകള്‍ക്കും അറിയാമെന്നും പഠനം ചൂണ്ടിക്കാട്ടുന്നു. ക്രെഡിറ്റ് കാര്‍ഡ് ഉപഭോക്താക്കളുടെ രീതികളെക്കുറിച്ചു പഠിക്കാനായി രാജ്യത്തെ എട്ടു മെട്രോ നഗരങ്ങളില്‍ നടത്തിയ പഠനത്തിലാണ് ഇക്കാര്യങ്ങള്‍ ചൂണ്ടിക്കാട്ടിയത്.

    പഠനത്തില്‍ പങ്കെടുത്തവരില്‍ 93 ശതമാനം പേരും തങ്ങളുടെ ക്രെഡിറ്റ് കാര്‍ഡ് ഓണ്‍ലൈന്‍, ഓഫ്‌ലൈന്‍ ഷോപ്പിങ്ങിനായി ഉപയോഗിക്കുന്നുണ്ട്. ക്രെഡിറ്റ് കാര്‍ഡുകളുടെ സൗകര്യങ്ങള്‍ പ്രയോജനപ്പെടുത്താനുള്ള പരമാവധി സൗകര്യങ്ങള്‍ ഏര്‍പ്പെടുത്തിയിട്ടുള്ളത് ഡെല്‍ഹിയിലാണ്. കൊല്‍ക്കത്ത, ബംഗളൂരു, ചെന്നൈ, ഹൈദരാബാദ് എന്നിവയുമായി താരതമ്യം ചെയ്യുമ്പോള്‍ ഡെല്‍ഹി, അഹമ്മദാബാദ്, പൂനെ, മുംബൈ എന്നിവിടങ്ങളില്‍ ക്രെഡിറ്റ് കാര്‍ഡ് ഉപയോഗം കൂടുതലാണ്.
    ഓരോ മാസവും ക്രെഡിറ്റ് കാര്‍ഡ് ബില്ലിനെ തുടര്‍ന്ന് അടക്കേണ്ട ഏറ്റവും കുറഞ്ഞ തുകയേക്കാള്‍ കൂടുതല്‍ അടക്കുന്ന ശീലമാണ് 92 ശതമാനം പേര്‍ക്കുമുള്ളത്. എങ്കില്‍ തന്നെയും ഇങ്ങനെ ഏറ്റവും കുറവ് അടക്കേണ്ടതില്‍ കൂടുതല്‍ തുക തിരിച്ചടക്കുന്നതു മൂലമുള്ള നേട്ടങ്ങളെക്കുറിച്ച് ധാരണയില്ലാത്തവരാണ് 33 ശതമാനം പേരും. പഠനത്തില്‍ പങ്കെടുത്തവരില്‍ 78 ശതമാനം പേരും തങ്ങളുടെ മുഴുവന്‍ ബാധ്യതയും പതിവായി അടച്ചു തീര്‍ക്കുന്നവരുമാണ്.

    സെറ്റില്‍മെന്റ് എന്ന പേരില്‍ അറിയപ്പെടുന്ന പണമടക്കല്‍ സംബന്ധിച്ച ഒത്തുതീര്‍പ്പുകള്‍ തങ്ങളുടെ വായ്പകള്‍ക്കായുള്ള അപേക്ഷകളുടെ വേളയില്‍ വിപരീത തലത്തിലുള്ള വിലയിരുത്തലുകള്‍ക്കു വഴിവെക്കും എന്നത് 77 ശതമാനം പേര്‍ക്കും അറിവു ണ്ടെന്നും പഠനം കണ്ടെത്തി.
    ക്രെഡിറ്റ് കാര്‍ഡ് തിരിച്ചടവുമായി ബന്ധപ്പെട്ട വ്യക്തികളുടെ രീതികള്‍ അവരുടെ മൊത്തത്തിലുള്ള വായ്പാ അനുബന്ധ സ്വഭാവങ്ങളെ സ്വാധീനിക്കുന്ന ഒന്നാണെന്ന് പഠനത്തെക്കുറിച്ചു സംസാരിക്കവേ ട്രാന്‍സ് യൂനിയന്‍ സിബില്‍ ചീഫ് ഓപ്പറേറ്റിങ് ഓഫിസര്‍ ഹര്‍ഷല ചന്ദോര്‍ക്കര്‍ ചൂണ്ടിക്കാട്ടി.