#ബാസിത് ഹസന്‍

തൊടുപുഴ: താപനില കുതിച്ചുയര്‍ന്നതോടെ അവധിദിനത്തിലും റെക്കോര്‍ഡിട്ട് വൈദ്യുതി ഉപഭോഗം. ഇന്നലെ രാവിലെ അവസാനിച്ച 24 മണിക്കൂറില്‍ 77.187 ദശലക്ഷം യൂനിറ്റായിരുന്നു ഉപഭോഗം. സംസ്ഥാന ചരിത്രത്തില്‍ ആദ്യമായാണ് ഒരു ഞായറാഴ്ച വൈദ്യുതി ഉപഭോഗം ഇത്രഉയരുന്നത്.

മാര്‍ച്ച് 17 ഞായറാഴ്ച ഇത് 73.616 ദശലക്ഷം യൂനിറ്റായിരുന്നു. തിങ്കളാഴ്ച പകല്‍ സംസ്ഥാനത്തിന്റെ പല മേഖലകളിലും താപനില 40 ഡിഗ്രിയോടടുത്തു. ഇന്നലെ ഉച്ചകഴിഞ്ഞ് 2.30ന് തൊടുപുഴയില്‍ 40 ഡിഗ്രി രേഖപ്പെടുത്തി.

ചൂട് അസഹനീയമായതോടെ സംസ്ഥാനത്ത് എയര്‍ കണ്ടീഷനര്‍, കൂളര്‍, ഫാന്‍ എന്നിവയുടെ ഉപയോഗത്തില്‍ വലിയ കുതിച്ചുചാട്ടമാണുണ്ടായിരിക്കുന്നത്. ഇതാണ് അവധിദിനമായിട്ടും വൈദ്യുതി ഉപഭോഗം കുത്തനെ ഉയരാന്‍ കാരണമെന്നാണ് കെ.എസ്.ഇ.ബി വിലയിരുത്തല്‍. മുന്‍ വര്‍ഷം ഇതേ സമയം പ്രവര്‍ത്തി ദിവസങ്ങളിലെ പരമാവധി ഉപഭോഗം 75 ദശലക്ഷം യൂനിറ്റായിരുന്നു. അവധി ദിവസങ്ങളില്‍ 65-67 ദശലക്ഷം യൂനിറ്റ് പിന്നിട്ടിട്ടില്ല.
തെരഞ്ഞെടുപ്പ് അനുബന്ധ പ്രവര്‍ത്തനങ്ങളും വൈദ്യുതി ഉപഭോഗം ഉയരാന്‍ കാരണമായി. ഈ വര്‍ഷം തെരഞ്ഞെടുപ്പ് സീസണില്‍ അവധി ദിവസങ്ങളിലെ പരമാവധി ഉപഭോഗം 76 ദശലക്ഷം യൂനിറ്റും പ്രവര്‍ത്തി ദിവസങ്ങളില്‍ 83-85 ദശലക്ഷം യൂനിറ്റുമാണ് കെ.എസ്.ഇ.ബി ലോഡ് ഡെസ്പാച്ച് യൂനിറ്റ് കണക്ക്കൂട്ടിയിരിക്കുന്നത്. കഴിഞ്ഞ 19ന് സംസ്ഥാനത്ത് ഉപയോഗിച്ച 83.0865 ദശലക്ഷം യൂനിറ്റ് വൈദ്യുതിയാണ് ഇതുവരെയുള്ള പ്രതിദിന റെക്കോര്‍ഡ്. ഇന്നലെ പകല്‍ ചൂട് വീണ്ടും ഉയര്‍ന്നതിനാല്‍ ഉപഭോഗം 85 ദശലക്ഷം എത്തുമെന്നാണ് സൂചന.

ഇന്നു രാവിലെ ഏട്ടുമണിക്ക് ശേഷമേ ഈ കണക്ക് ലഭ്യമാകൂ. ഉപഭോഗം ഇനിയും ഉയര്‍ന്നാല്‍ ഉണ്ടാകുന്ന വൈദ്യുതി പ്രതിസന്ധി എങ്ങനെ തരണം ചെയ്യുമെന്ന ആലോചനയിലാണ് വൈദ്യുതി ബോര്‍ഡ്. പവര്‍ എക്‌സ്‌ചേഞ്ചില്‍ വൈദ്യുതി വില ഉയരാത്തത് നേരിയ ആശ്വാസം നല്‍കുന്നുണ്ട്.
കഴിഞ്ഞ കാലവര്‍ഷത്തില്‍ കേരളം ഹരിയാനയ്ക്ക് നല്‍കിയ വൈദ്യുതി ഇപ്പോള്‍ തിരിച്ച് ലഭിക്കുന്നതും വലിയ ആശ്വാസമാണ്.

3.51408 ദശലക്ഷം യൂനിറ്റ് വൈദ്യുതി ഇന്നലെ ഹരിയാനയില്‍ നിന്ന് ലഭിച്ചു. സംസ്ഥാനത്തെ സംഭരണികളിലാകെ 46.5 ശതമാനം വെള്ളമാണ് ഇനി അവശേഷിക്കുന്നത്. 1936.824 ദശലക്ഷം യൂനിറ്റ് വൈദ്യുതി ഉല്‍പ്പാദിപ്പിക്കാനുള്ള വെള്ളമുണ്ടിത്. ഇടുക്കി അണക്കെട്ടിലെ ജലനിരപ്പ് ശേഷിയുടെ 49 ശതമാനത്തിലെത്തി. 60.0159 ദശലക്ഷം യൂനിറ്റ് വൈദ്യുതിയാണ് ഇന്നലെ പുറത്തുനിന്നും എത്തിച്ചത്. 17.1711 ദശലക്ഷം യൂനിറ്റായിരുന്നു ആഭ്യന്തര ഉല്‍പ്പാദനം.