ജയ്പൂര്‍: ജോര്‍ജ് ഫ്‌ളോയിഡ് എന്ന കറുത്തവര്‍ഗക്കാരനെ അമേരിക്കന്‍ പൊലിസ് കഴുത്തില്‍ കാല്‍മുട്ട് അമര്‍ത്തി കൊലപ്പെടുത്തിയത് ലോകം ചര്‍ച്ച ചെയ്യവേ ഇന്ത്യയിലും സമാന പൊലിസ് മുറ. രാജസ്ഥാനിലെ ജോധ്പൂരിലാണ് മാസ്‌ക് ധരിക്കാത്തതിന് ഒരാളുടെ കഴുത്തില്‍ പൊലിസുകാരന്‍ കാല്‍മുട്ട് അമര്‍ത്തിനില്‍ക്കുന്ന ദൃശ്യം പുറത്തായത്.

മുകേഷ് കുമാര്‍ പ്രജാപതി എന്നയാള്‍ക്കാണ് മര്‍ദനമേറ്റത്. എന്നാല്‍, കൊവിഡ് പ്രതിരോധത്തിന്റെ ഭാഗമായി മാസ്‌ക് ധരിക്കല്‍ നിര്‍ബന്ധമായിട്ടും ഇതു ധരിക്കാത്തത് ചോദ്യം ചെയ്തപ്പോള്‍ ഇയാള്‍ അക്രമിച്ചെന്നും അപ്പോള്‍ കീഴ്‌പ്പെടുത്തുകയാണുണ്ടായതെന്നുമാണ് പൊലിസ് വിശദീകരിക്കുന്നത്. ഒരു പൊലിസുകാരന്‍ കഴുത്തില്‍ കാല്‍മുട്ട് അമര്‍ത്തി നില്‍ക്കുന്നതും മറ്റു രണ്ടു പൊലിസുകാര്‍ മുകേഷിന്റെ കാലുകള്‍ പിടിച്ചുവയ്ക്കുന്നതുമായ ദൃശ്യമായിരുന്നു പുറത്തായിരുന്നത്. ദേവ്‌നഗര്‍ പൊലിസ് നല്‍കിയ പരാതിയനുസരിച്ച് മുകേഷിനെതിരേ കേസെടുത്തിട്ടുമുണ്ട്. മുകേഷ് മാനസികാസ്വാസ്ഥ്യമുള്ളയാളാണെന്നാണ് വിവരം.