ന്യൂഡല്‍ഹി: ന്യൂനപക്ഷ പദവി സംബന്ധിച്ച കേസില്‍ മറുപടി സത്യവാങ്മൂലം നല്‍കാന്‍ അലിഗഡ് മുസ്‌ലിം സര്‍വകലാശാലയ്ക്കു സുപ്രിംകോടതി നാലാഴ്ച സമയമനുവദിച്ചു. സര്‍വകലാശാലയുടെ ന്യൂനപക്ഷ പദവി നിലനില്‍ക്കുന്നതല്ലെന്നു ചൂണ്ടിക്കാട്ടി കേന്ദ്രസര്‍ക്കാര്‍ സുപ്രിംകോടതിയില്‍ സത്യവാങ്മൂലം സമര്‍പ്പിച്ചിരുന്നു. ഇതിന് എതിര്‍സത്യവാങ്മൂലം സമര്‍പ്പിക്കാനാണ് സര്‍വകലാശാലയ്ക്കുവേണ്ടി ഹാജരായ മുതിര്‍ന്ന അഭിഭാഷകന്‍ പി.പി റാവുവിനോട് ജസ്റ്റിസ് ജെ.എസ് ഖേഹര്‍ അധ്യക്ഷനായ സുപ്രിംകോടതി ബെഞ്ച് നിര്‍ദേശിച്ചത്.
സര്‍വകലാശാല ന്യൂനപക്ഷ സ്ഥാപനമാണെന്ന യു.പി.എ സര്‍ക്കാരിന്റെ സത്യവാങ്മൂലം പിന്‍വലിച്ചാണു കഴിഞ്ഞ ദിവസം എന്‍.ഡി.എ സര്‍ക്കാര്‍ പുതിയ സത്യവാങ്മൂലം സമര്‍പ്പിച്ചത്. സര്‍വകലാശാലയിലെ മെഡിക്കല്‍ ഫാക്കല്‍റ്റിയില്‍ മുസ്‌ലിംകള്‍ക്ക് 50 ശതമാനം സംവരണം നല്‍കുന്നതിനെ പിന്തുണച്ചു നല്‍കിയ സത്യവാങ്മൂലം ഉള്‍പ്പെടെ, ഇതുമായി ബന്ധപ്പെട്ടു യു.പി.എ സര്‍ക്കാര്‍ സമര്‍പ്പിച്ച എല്ലാ രേഖകളും ഇപ്പോഴത്തെ സര്‍ക്കാര്‍ പിന്‍വലിച്ചിരുന്നു.
നേരത്തേ, കേസ് പരിഗണിക്കുന്നതിനിടെ അലിഗഡിനെ ന്യൂനപക്ഷ സ്ഥാപനമായി കേന്ദ്രസര്‍ക്കാര്‍ കാണുന്നില്ലെന്നും ഒരു മതേതര സമൂഹത്തില്‍ ന്യൂനപക്ഷ സ്ഥാപനങ്ങള്‍ അനുവദിക്കാനാകില്ലെന്നും ജസ്റ്റിസ് ജെ.എസ്. ഖേഹറിന്റെ ബെഞ്ചിനെ അറ്റോര്‍ണി ജനറല്‍ മുകുള്‍ രോഹ്തഗി അറിയിച്ചിരുന്നു.