കയ്പമംഗലം: എടത്തിരുത്തി മധുരംപിള്ളിയില്‍ മാണിയംതാഴത്ത് കക്കൂസ് മാലിന്യം തള്ളല്‍ പതിവാകുന്നു. ഇരുളിന്റെ മറവിലാണ് സാമൂഹ്യ ദ്രോഹികള്‍ ജനവാസ കേന്ദ്രമായ മാണിയംതാഴം പ്രദേശത്ത് കക്കൂസ് മാലിന്യം തള്ളി കടന്നു കളയുന്നത്. പതിവുപോലെ പ്രദേശത്ത് തള്ളാനായി കക്കൂസ് മാലിന്യം നിറച്ചെത്തിയ വാഹനം അപകടത്തില്‍പ്പെട്ട് ഒരാള്‍ക്ക് പരുക്കേറ്റു.
 ചേറ്റുവ സ്വദേശി പണിക്കവീട്ടില്‍ ഷറഫുദ്ധീനാണ് പരുക്കേറ്റത്. ഇയാളെ ആക്ട്‌സ് പ്രവര്‍ത്തകര്‍ തൃശൂരിലെ ആശുപത്രിയില്‍ പ്രവേശിപ്പിച്ചു. ഇന്നലെ പുലര്‍ച്ചെ നാലോടെയായിരുന്നു സംഭവം. മാണിയം താഴം പാടത്ത് മാലിന്യം തള്ളാന്‍ എത്തിയതായിരുന്നു വാഹനമെന്ന് നാട്ടുകാര്‍ പറഞ്ഞു.
 മാലിന്യം തള്ളുന്നത് തടയാന്‍ നാട്ടുകാര്‍ ഓടിവരുന്നത് കണ്ട് പെട്ടെന്ന് മുന്നോട്ടെടുത്ത വാഹനം നിയന്ത്രണംവിട്ട്  സമീപത്തെ കമ്പിവേലിയിലും തെങ്ങിലും ഇടിച്ച് തൊട്ടടുത്ത കരിങ്കല്‍ ഭിത്തിയില്‍ ഇടിച്ചു നില്‍ക്കുകയായിരുന്നു. വാഹനത്തില്‍ ഉണ്ടായിരുന്ന മറ്റു രണ്ടുപേര്‍ ഓടി രക്ഷപ്പെട്ടു. സംഭവമറിഞ്ഞ് മതിലകം പൊലിസും സ്ഥലത്തെത്തിയിരുന്നു. എടത്തിരുത്തി മാണിയം താഴം പാടത്ത് കക്കൂസ് മാലിന്യം തള്ളുന്നത് പതിവായതിനാല്‍ ജനം പൊറുതി മുട്ടിയിയിരിക്കുകയാണ്.
ഒരു മാസത്തിനിടെ പത്തോളം തവണയാണ് പ്രദേശത്ത് മാലിന്യം നിക്ഷേപിച്ചിരിക്കുന്നത്. കൂടാതെ കല്യാണ വീടുകളില്‍ നിന്നുള്ള മാലിന്യവും അറവ് മാലിന്യങ്ങളും ഈ പ്രദേശത്താണ് പലരും നിക്ഷേപിക്കുന്നത് പതിവായതോടെ നാട്ടുകാര്‍ പൊലിസില്‍ പരാതിയും നല്‍കിയിരുന്നു. മാലിന്യം തള്ളാന്‍ എത്തുന്നവരെ പിടിക്കാന്‍ വേണ്ടി നാട്ടുകാര്‍ ഉറക്കമൊഴിച്ച് കാത്തിരിക്കുകയും ചെയ്തു. പൊതുസ്ഥലങ്ങളില്‍ മാലിന്യം നിഷേപിക്കുന്നവര്‍ക്കെതിരെ ശക്തമായ നടപടി സ്വീകരിക്കണമെന്ന് വാര്‍ഡ് മെമ്പര്‍ ശ്രീദേവി ദിനേശ് ആവശ്യപ്പെട്ടു. മാലിന്യം തള്ളുന്നത് അവസാനിപ്പിക്കാന്‍ പ്രദേശത്ത് നിരീക്ഷണ ക്യാമറകള്‍ സ്ഥാപിക്കണമെന്ന് നാട്ടുകാര്‍ ആവശ്യപ്പെട്ടു.