ജറൂസലം: രാജ്യം കൊവിഡിനെതിരായ പോരാട്ടത്തിലാണെങ്കിലും ഇറാന്‍ ആണവായുധം സ്വന്തമാക്കുന്നത് ഏതു വിധേനയും തടയുമെന്ന് ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹു.
ഇന്നലെ കാബിനറ്റ് യോഗത്തിനു ശേഷമാണ് അദ്ദേഹം ഇക്കാര്യം പ്രഖ്യാപിച്ചത്. സൈനിക ആണവകേന്ദ്രങ്ങള്‍ സന്ദര്‍ശിക്കാന്‍ അന്താരാഷ്ട്ര ആണവോര്‍ജ ഏജന്‍സി പരിശോധകര്‍ക്ക് ഇറാന്‍ അനുമതി നല്‍കിയില്ലെന്ന റിപ്പോര്‍ട്ട് അദ്ദേഹം ചൂണ്ടിക്കാട്ടി.
അന്താരാഷ്ട്ര പരിശോധകരെ വിലക്കിയും യുറേനിയം പരിധിയിലധികം സമ്പുഷ്ഠീകരിച്ചും ഇറാന്‍ ചട്ടലംഘനം നടത്തുകയാണ്. ഇറാനെതിരായ ഉപരോധങ്ങള്‍ കൂടുതല്‍ ശക്തിപ്പെടുത്തണം. കൊവിഡ് അതിനു വിഘാതമാവില്ലെന്നും നെതന്യാഹു കൂട്ടിച്ചേര്‍ത്തു.