റിയാദ്: ഈ വർഷത്തെ ഹജ്ജ് പരിമിതമായ ആളുകളെ പങ്കെടുപ്പിച്ചായിരിക്കും നടത്തുകയെന്ന് റിപ്പോർട്ട്. വിവിധ കേന്ദ്രങ്ങളെ ഉദ്ധരിച്ച് റോയിട്ടേഴ്‌സ് ആണ് ഇക്കാര്യം റിപ്പോർട്ട് ചെയ്‌തിരിക്കുന്നത്‌. കൊവിഡ് മഹാമാരി വ്യാപകമാകുന്ന പശ്ചാത്തലത്തിലാണ് ഇത്തരത്തിലൊരു തീരുമാനം കൈക്കൊള്ളാൻ സഊദി അധികൃതർ തയ്യാറാകുന്നതെന്നാണ് റിപ്പോർട്ടിൽ പറയുന്നത്. ഹജ്ജിനു പൂർണ്ണ നിയന്ത്രണം ഏർപ്പെടുത്താതെ വളരെ തുച്ഛമായ ആളുകളെ പങ്കെടുക്കാൻ അവസരം നൽകാനാണ് സഊദി അധികൃതരുടെ ശ്രമമെന്നും അത് തന്നെ കർശനമായ ആരോഗ്യ പരിശോധനകൾക്കും മറ്റും വിധേയമായിട്ടായിരിക്കുമെന്നും റോയിട്ടേഴ്‌സ് റിപ്പോർട്ടിൽ വ്യക്തമാക്കുന്നു. രണ്ടു കേന്ദ്രങ്ങളെ ഉദ്ധരിച്ചാണ് റോയിട്ടേഴ്‌സ് ഇക്കാര്യം റിപ്പോർട്ട് ചെയ്‌തിരിക്കുന്നത്‌. എന്നാൽ മറ്റൊരു കേന്ദ്രം പൂർണ്ണമായും ഹജ്ജ് നിർത്തണമെന്ന തീരുമാനത്തിലാണെന്നും റിപ്പോർട്ടിൽ സൂചിപ്പിക്കുന്നു. അതേസമയം, റിപ്പോർട്ടുകളെ കുറിച്ച് സഊദിയുടെ ഔദ്യോഗിക പ്രതികരണങ്ങൾ പുറത്ത് വന്നിട്ടില്ല.

    ഓരോ രാജ്യങ്ങൾക്കും അനുവദിച്ച ഹജ്ജ് ക്വാട്ടയിൽ നിന്നും ഇരുപത് ശതമാനം വരെ തീർത്ഥാടകരെ പങ്കെടുപ്പിക്കാനാണ് സാധ്യതയെന്നാണ് റിപ്പോർട്ട്. എന്നാൽ, ഒരു വിഭാഗം വിദേശ രാജ്യങ്ങളിൽ നിന്നും തീർത്ഥാടകരെ എത്തിക്കുന്നത് പൂർണ്ണമായും തടയണമെന്നാണ് ആവശ്യപ്പെടുന്നതെന്നും റിപ്പോർട്ടിൽ സൂചിപ്പിച്ചു.

    അതേസമയം, ഈ വർഷത്തെ ഹജ്ജിനു തീർത്ഥാടകരെ അയക്കേണ്ടതില്ലെന്നു ഏറ്റവും കൂടുതൽ ഹാജിമാരെ അയക്കുന്ന ഇന്തോനേഷ്യ നേരത്തെ തന്നെ തീരുമാനിച്ചിട്ടുണ്ട്. ഇന്ത്യ ഇതേ കുറിച്ച് പ്രതികരിച്ചിട്ടില്ലെങ്കിലും ഹജ്ജ് യാത്ര അനിശ്‌ചിതത്വത്തിലായതിനാൽ യാത്ര ഉപേക്ഷിക്കാൻ ആഗ്രഹിക്കുന്നവർക്ക് പണം തിരികെ നൽകാൻ ഇന്ത്യൻ ഹജ്ജ് കമ്മിറ്റി സംവിധാനം സജ്ജീകരിച്ചിട്ടുണ്ട്. ഇന്ത്യയിൽ നിന്നും 125000 തീർത്ഥാടകരാണ് ഈ വർഷം ഹജ്ജിനായി ആദ്യ കടവും രണ്ടാം ഗഡുവും അടച്ചു കാത്തിരിക്കുന്നത്. ഇതിനിടെയാണ്‌ ഇന്ത്യൻ ഹജ്ജ് കമ്മിറ്റി പണം തിരികെ നൽകുന്നതിനുള്ള നടപടികൾ ആരംഭിച്ചത്. കഴിഞ്ഞ മാർച്ച് മുതൽ ഹജ്ജുമായി ബന്ധപ്പെട്ട നടപടികൾ നിർത്തിവെക്കാനുള്ള നിർദേശമാണ് ലഭിച്ചിരുന്നത്. പിന്നീട് ഇത് സംബന്ധമായ ഒരു നിർദേശങ്ങളും ലഭ്യമായിട്ടില്ല.

    നിലവിൽ വിദേശ, ആഭ്യന്തര ഉംറ തീർത്ഥാടകരെ പോലും സഊദി അറേബ്യ അനുവദിക്കുന്നില്ല. കൊവിഡ് പശ്ചാത്തതിൽ ഇക്കഴിഞ്ഞ മാർച്ചിനാണു വിദേശ രാജ്യങ്ങളിലെ ഉംറ തീർത്ഥാടകരുടെ വരവ് സഊദി അറേബ്യ നിരോധിച്ചത്. മാർച്ചിൽ അന്തരാഷ്ട്ര വിമാന സർവ്വീസുകൾ നിർത്തി വെച്ചതോടെയാണ് ഉംറ തീർത്ഥാടനവും വിലക്കിയത്. കഴിഞ വർഷം 19 മില്യൺ ഉംറ തീർത്ഥാടകരും 2.6 മില്യൺ ഹജ്ജ് തീർത്ഥാടകരുമാണ് സഊദിയിലെത്തിയിരുന്നത്.

    ജൂലൈ അവസാന ആഴ്ച്ചയോടെയാണ് ഒരാഴ്ച്ച നീളുന്ന ഹജ്ജിനു പ്രാരംഭം കുറിക്കുക. സാധാരണ ഗതിയിൽ വിദേശ രാജ്യങ്ങളിൽ നിന്നുള്ള ഹജ്ജ് തീർത്ഥാടകർ സഊദിയിൽ വിശുദ്ധ ഹജ്ജ് തീർത്ഥാടനത്തിനായി എത്തിച്ചേരുന്ന സമയം കഴിഞ്ഞിട്ടുണ്ട്. എന്നാൽ, ഈ വർഷത്തെ ഹജ്ജ് സംബന്ധിച്ച് വ്യക്തമായ വിവരം ഉടൻ തന്നെ സഊദി ഹജ്ജ് ഉംറ മന്ത്രാലയം പുറത്ത് വിടുമെന്നാണ് കരുതുന്നത്.