ചങ്ങരംകുളം: പൊന്നാനി താലൂക്ക് കേന്ദ്രീകരിച്ച് വിദ്യാര്‍ഥികള്‍ക്ക് കഞ്ചാവ് എത്തിക്കുന്ന ആള്‍ എക്‌സൈസിന്റെ പിടിയിലായി. പാലപ്പെട്ടി അയിരൂര്‍ സ്വദേശി അണ്ടത്തോട് വീട്ടില്‍ മുഹമ്മദ് റാഫി (37)യെയാണ് പൊന്നാനി കുറ്റിപാല എക്‌സൈസ് ഇന്നലെ പിടികൂടിയത്. കഴിഞ്ഞദിവസം നടുവട്ടം അയിലക്കാട് മേഖലയില്‍ നിന്നു കഞ്ചാവുമായി 18 വയസിന് താഴെയുള്ള വിദ്യാര്‍ഥികളെ എക്‌സൈസ് പിടികൂടിയിരുന്നു.
ഇവരില്‍ നിന്നു ലഭിച്ച വിവരപ്രകാരം മേഖലയില്‍ വിദ്യാര്‍ഥികള്‍ക്ക് കഞ്ചാവ് എത്തിക്കുന്നത് റാഫിയാണെന്ന് അറഅിയുകയും തുടര്‍ന്ന് ആവശ്യക്കാരെന്ന വ്യാജേനെ എക്‌സൈസ് ഇയാളെ സമീപിച്ച് പിടികൂടുകയുമായിരുന്നു.
ഇയാളില്‍ നിന്നും ഏകദേശം കാല്‍ കിലോ വരുന്ന കഞ്ചാവുകള്‍ പൊതികളോടെ പിടികൂടിയിട്ടുണ്ട്. ചങ്ങരംകുളം, പാവിട്ടപ്പുറം, കോക്കൂര്‍ , ചിറവലൂര്‍ , എരമംഗലം , പുറങ്ങ് , വെളിയംകോട്, പുത്തന്‍പള്ളി, പൊന്നാനി മേഖലകളിലും വിദ്യാര്‍ഥികളെ കേന്ദ്രീകരിച്ച് ഇയാള്‍ കഞ്ചാവ് വില്‍പന നടത്തുന്നതായും വിവരം ലഭിച്ചിട്ടുണ്ട്. ചോദ്യം ചെയ്യലില്‍ മൊത്തക്കച്ചവടക്കാരനെ കുറിച്ച് വിവരം ലഭിച്ചതായും സൂചനയുണ്ട്.
എക്‌സൈസ് ഉദ്യോഗസ്ഥരായ പി ശ്രീജേഷ്, കെ ജാഫര്‍, വി സുദര്‍ഷന്‍, വി.പി പ്രമോദ്, ടി മൊയ്തീന്‍ കോയ എന്നിവരുടെ നേതൃത്തത്തിലാണ് പ്രതികളെ പിടികൂടിയത്.