കാഞ്ഞങ്ങാട്: 'കളിക്കളം സംരക്ഷിക്കാന്‍ കൈകോര്‍ക്കാം' എന്ന മുദ്രാവാക്യം ഉയര്‍ത്തി കെ.എസ്.യു നേതൃത്വത്തില്‍ നഗരസഭാ ഓഫിസിനു മുന്‍പില്‍ പ്രതീകാത്മക കളിക്കളം തീര്‍ത്തു.
ഇന്നലെ നഗരസഭ കൗണ്‍സില്‍ യോഗം ചേരുന്ന സമയത്താണു കാഞ്ഞങ്ങാട് നഗരസഭക്ക് മുന്‍പില്‍ പ്രതീകാത്മക കളിക്കളം തീര്‍ത്തു കൊണ്ട് പ്രവര്‍ത്തകര്‍ വോളിബോള്‍ കളിച്ചത്. ഹൊസ്ദുര്‍ഗ് ഗവ. ഹയര്‍ സെക്കന്‍ഡറി സ്‌കൂളിന്റെ മിനിസ്റ്റേഡിയം കൈയേറി വയോജന മന്ദിരം പണിയുന്ന നഗരസഭയുടെ നടപടിക്കെതിരേയാണു കെ.എസ്.യു വേറിട്ട പ്രതിഷേധം സംഘടിപ്പിച്ചത്.
യൂത്ത് കോണ്‍ഗ്രസ് കാസര്‍കോട് പാര്‍ലമെന്റ് മണ്ഡലം പ്രസിഡന്റ് സാജിദ് മൗവ്വല്‍ ഉദ്ഘാടനം ചെയ്തു. കെ.എസ്.യു ജില്ലാ പ്രസിഡന്റ് നോയല്‍ ടോമിന്‍ ജോസഫ് അധ്യക്ഷനായി. നിഖില്‍ ചിറക്കല്‍, പദ്മരാജന്‍ ഐങ്ങോത്ത്, ശ്രീജിത്ത് ചോയ്യംകോട്, എം കുഞ്ഞികൃഷ്ണന്‍, പ്രവീണ്‍ തോയമ്മല്‍, സന്തു ടോം ജോസഫ്, നവനീത് ചന്ദ്രന്‍, രഞ്ജില്‍ രാജീവ്, ഹര്‍ഷിക് എസ് ഭട്ട്, ഇസ്മായില്‍ ചിത്താരി, കെ.ജി ഗോഗുല്‍,സി.കെ രോഹിത്ത് എന്നിവര്‍ സംസാരിച്ചു.