കൊച്ചി:വാഹനാപകടത്തില്‍ മരണപ്പെട്ട തന്റെ മകള്‍ നിവേദിത അറക്കല്‍ എന്ന ഫാത്തിമ ലൗ ജിഹാദിന്റെ ഇരയല്ലെന്ന് പിതാവ് ഷാജി ജോസഫ് അറയ്ക്കല്‍. മതവ്യത്യാസങ്ങളുടെ പേരില്‍ ഇത്തരത്തില്‍ ഊഹാപോഹങ്ങള്‍ എഴുതി പ്രചരിപ്പിച്ച് സമൂഹത്തില്‍ വിദ്വേഷത്തിന്റെ വിത്ത് വിതയ്ക്കരുതെന്നും ഷാജി ജോസഫ് ഫേസ് ബുക്കിലൂടെ അപേക്ഷിച്ചു. എഴുതാനുള്ള ഒരു മനസികാവസ്ഥയിലല്ല താനെന്നും എന്നാല്‍ മകളുടെ വിവാഹത്തെക്കുറിച്ചും ഭര്‍ത്താവിന്റെ വീട്ടുകാരെക്കുറിച്ചും സാമൂഹ്യമാധ്യമങ്ങളില്‍  ഊഹാപോഹങ്ങള്‍ പ്രചരിപ്പിക്കുന്നവര്‍ക്കായാണ് താന്‍ കുറിക്കുന്നതെന്നും അദ്ദേഹം പറയുന്നു.ഒരേ കാംപസില്‍ പഠിച്ചുകൊണ്ടിരിക്കെ, അമീന്‍ എന്ന യുവാവുമായി പ്രണയത്തിലാകുകയും നിയമപരമായി വിവാഹം രജിസ്റ്റര്‍ ചെയ്തു പരസ്പര സ്‌നേഹത്തിലും സന്തോഷത്തിലും കുടുംബാംഗങ്ങളോടൊപ്പം ജീവിച്ചുപോരുകയുമായിരുന്നു അവള്‍. 'മത മൗലിക വാദമൊന്നുമില്ലാത്ത, വ്യക്തിസ്വാതന്ത്ര്യത്തെ ഒരുതരി പോലും മുറിപ്പെടുത്തിയിട്ടില്ലാത്ത വളരെ സ്‌നേഹസമ്പന്നരായ മാതാപിതാക്കളും സഹോദരങ്ങളും ബന്ധുക്കളുമടക്കം അംഗങ്ങള്‍ അധികമുള്ള മലപ്പുറത്തെ ഒരു മുസ്‌ലിം കുടുംബമാണ് എന്റെ മകളുടെ ഭര്‍ത്താവായ അമീനിന്റേത്. എന്റെ മകള്‍ ഫോണിലൂടെ എല്ലാ ദിവസവും ഞങ്ങളോടു പറഞ്ഞതും ഞങ്ങള്‍ നേരിട്ടറിഞ്ഞതുമനുസരിച്ചു അവളെ അവര്‍ ഏറെ കരുതലോടെയും സ്‌നേഹത്തോടെയുമാണ് കണ്ടിരുന്നത്.' അവളുടെ അടുത്ത സുഹൃത്തുക്കള്‍ക്കും ഈ യാഥാര്‍ഥ്യങ്ങള്‍ അറിവുള്ളതാണെന്നും അദ്ദേഹം പറഞ്ഞു. തങ്ങളുടെ ഇടവക സെമിത്തേരിയില്‍ അവളെ അടക്കം ചെയ്യാന്‍ അവളുടെ മൃതശരീരം വിട്ടുതന്നതുതന്നെ അമീന്റെ കുടുംബത്തിന്റെ ഹൃദയവിശാലതയെ തുറന്നുകാട്ടുന്നതാണെന്നും അദ്ദേഹം കുറിച്ചു.

കഴിഞ്ഞ ശനിയാഴ്ചയാണ് പെരുമ്പിലാവില്‍ വച്ച് കാറുകള്‍ കൂട്ടിയിടിച്ചുണ്ടായ അപകടത്തില്‍ നിവേദിത എന്ന ഫാത്തിമ മരിച്ചത്. അപകടവാര്‍ത്ത പുറത്തു വന്നതിന് പിന്നാലെ നിവേദിത ലൗ ജിഹാദിന്റെ ഇരയാണ് എന്ന തരത്തില്‍ സാമൂഹ്യമാധ്യമങ്ങള്‍ വഴി വ്യാപകമായ പ്രചാരണം നടന്നിരുന്നു.