രാജപുരം: സെക്രട്ടറി ഇല്ലാതെ കള്ളാര്‍ പഞ്ചായത്ത് ദുരിതമനുഭവിക്കുന്നു. സെക്രട്ടറി ഇല്ലാതായിട്ട് മൂന്നു മാസം പിന്നിടുകയാണ്. നിലവിലുണ്ടായിരുന്ന സെക്രട്ടറി ജനുവരിയില്‍ വിരമിച്ചതോടെയാണ് ഈ തസ്തിക ഒഴിഞ്ഞുകിടക്കുന്നത്. സെക്രട്ടറി വിരമിച്ചതോടെ കൊല്ലം സ്വദേശി സെക്രട്ടറിയായി ചുമതല ഏറ്റെടുത്തിരുന്നുവെങ്കിലും രണ്ടാഴ്ചത്തെ സേവനത്തിനു ശേഷം സ്ഥലം മാറ്റം വാങ്ങി പോവുകയായിരുന്നു. അസി. സെക്രട്ടറിയുണ്ടെങ്കിലും അദ്ദേഹത്തിനു പരിമിതിയുള്ളതും ഏറെ ബാധിക്കുന്നു.
കഴിഞ്ഞ വര്‍ഷത്തെ പദ്ധതികളുടെ അന്തിമ കാര്യങ്ങള്‍ ചെയ്യേണ്ട സമയത്താണ് നിര്‍വഹണ ഉദ്യോഗസ്ഥന്റെ അഭാവമുണ്ടായത്. എന്നിട്ടും സെക്രട്ടറി ഇല്ലെന്ന പരിമിതി തരണം ചെയ്തു പദ്ധതി നിര്‍വഹണത്തില്‍ പഞ്ചായത്ത് ഒന്നാം സ്ഥാനത്തും സംസ്ഥാനത്ത് പത്താം സ്ഥാനത്തും എത്തിയത് ഭരണ സമിതിയിടെയും ഉദ്യോഗസ്ഥരുടെയും കൂട്ടായ്മ കൊണ്ടു മാത്രമാണ്.
അടുത്ത വര്‍ഷത്തെ പദ്ധതി പ്രവര്‍ത്തനങ്ങള്‍ തുടങ്ങേണ്ട സമയമാകാറായിട്ടും സെക്രട്ടറിയില്ലാതെയാണു കാര്യങ്ങള്‍ നീക്കേണ്ടതെന്നതു ഭരണ സമിതിയ്ക്ക് ഏറെ തലവേദനയുണ്ടാക്കുന്നു.
സെക്രട്ടറിയില്ലാത്ത കാര്യം ബന്ധപ്പെട്ടവരെ പല തവണ അറിയിച്ചിട്ടും നടപടികളൊന്നുമായിട്ടില്ലെന്നാണു ഭരണ സമിതി അംഗങ്ങള്‍ പറയുന്നത്.