തിരുവനന്തപുരം: വന്യജീവി ആക്രമണം തടയാന്‍ സംസ്ഥാന ബജറ്റില്‍ 50 കോടി അനുവദിച്ചതായി ധനമന്ത്രി അറിയിച്ചു.  വന്യജീവി ആക്രമണവും നഷ്ടപരിഹാരവും പ്രതിരോധവും ഉള്‍പ്പെടെ വനംവന്യജീവി മേഖലയിലെ പ്രവര്‍ത്തനങ്ങള്‍ക്കായി പദ്ധതി വിഹിതത്തിന് പുറമെ പ്രത്യേക പാക്കേജിനാണ് 50 കോടി അധികമായി അനുവദിച്ചത്. പ്ലാനില്‍ അനുവദിച്ച തുകക്ക് പുറമേയാണിതെന്ന് ധനമന്ത്രി കെ.എന്‍. ബാലഗോപാല്‍ വ്യക്തമാക്കി.

വന്യജീവി ആക്രമണത്തിന് നല്‍കുന്ന നഷ്ടപരിഹാരവും സര്‍ക്കാര്‍ വര്‍ധിപ്പിച്ചതായി മന്ത്രി വ്യക്തമാക്കി.  റാപ്പിഡ് റെസ്‌പോണ്‍സ് ടീമുകള്‍ രൂപീകരിക്കുന്നതിനും മറ്റ് പ്രവര്‍ത്തനങ്ങള്‍ ഏകോപിപ്പിക്കുന്നതിനുമുള്ള വിഹിതം വര്‍ധിപ്പിച്ചിട്ടുണ്ട്.

കേന്ദ്രസംസ്ഥാന സര്‍ക്കാരുകള്‍ ചേര്‍ന്ന് വന്യജീവി പെരുപ്പത്തെ നിയന്ത്രിക്കാന്‍ നിയമനിര്‍മാണം നടത്തേണ്ടതുണ്ട്. ഇതിനുള്ള ഇടപെടലിന് സര്‍ക്കാര്‍ മുന്‍കൈ എടുക്കും.

വനംവന്യജീവി മേഖലക്ക് 2025-26 വര്‍ഷത്തേക്ക് 305.61 കോടി രൂപ ബജറ്റില്‍ വകയിരുത്തി. വന്യജീവി ആക്രമണം തടയാനുള്ള 50 കോടിക്ക് പുറമേയാണിത്. കേന്ദ്ര സഹായമായി 45.47 കോടി പ്രതീക്ഷിക്കുന്നു.

ജലസുരക്ഷ മെച്ചപ്പെടുത്തുക, മനുഷ്യവന്യമൃഗ സംഘര്‍ഷം ലഘൂകരിക്കുക, വനമേഖലയെ ആശ്രയിച്ച് കഴിയുന്നവരുടെ ജീവനും ജീവനോപാധികള്‍ക്ക് സംരക്ഷണം നല്‍കുക, കാലാവസ്ഥ വ്യതിയാനങ്ങള്‍ക്കുള്ള കവചമായി ജനങ്ങളെ ഉള്‍പ്പെടുത്തിയുടെ പ്രവര്‍ത്തനങ്ങള്‍ക്കാണ് 2025-26 വര്‍ഷം ഊന്നല്‍ നല്‍കുന്നതെന്നും ധനമന്ത്രി ബജറ്റ് പ്രസംഗത്തില്‍ ചൂണ്ടിക്കാട്ടി.