ആലപ്പുഴ: കഷണ്ടികൊണ്ട് എന്തു കാര്യമെന്ന് ചോദിക്കാൻ വരട്ടെ. വരുമാന മാർഗമായി മാറുമെന്ന് അമ്പലപ്പുഴ സ്വദേശി ഷഫീഖ് ഹാഷിമിൻ്റെ അനുഭവം. 50,000 രൂപയാണ് ആദ്യമായി കിട്ടിയത്.  കേരളത്തിൽ ആദ്യമായിരിക്കും ഒരാൾ തല പരസ്യബോർഡ് ആക്കി മാറ്റുന്നത്. ട്രാവൽ വ്‌ളോഗറായ ഷഫീഖ് കഷണ്ടിത്തലയിൽ പരസ്യം പതിക്കുമെന്ന് പരസ്യം ചെയ്തിരുന്നു. നിരവധി കമ്പനികളാണ് ഈ തല തേടിവന്നത്.

ചെറിയ പ്രായത്തിലെ തലയിൽ കഷണ്ടി കയറിയതോടെ ഹെയർ ട്രാൻസ് പ്ലാൻ്റ് ചെയ്യാമെന്ന ചിന്തയായിരുന്നു ആദ്യം.  ഇതിനിടെയാണ് പരസ്യം നൽകി വരുമാനം നേടാമെന്ന ആശയം ഉദിച്ചത്. ഒരു കുറിപ്പും പങ്കുവച്ചു. ദിവസങ്ങൾക്കുള്ളിൽ നൂറുകണക്കിന് കമ്പനികളാണ് സമീപിച്ചത്.

ചർച്ചകൾക്കൊടുവിൽ ആദ്യത്തെ കരാർ ഏറ്റെടുത്തു. കൊച്ചി ആസ്ഥാനമായ ഹെയർ ട്രാൻസ് പ്ലാൻ്റ് കമ്പനിയുടെ പരസ്യത്തിനാണ് മൂന്ന് മാസത്തേക്ക് 50,000 രൂപയ്ക്ക് കരാർ. എപ്പോഴും ഈ പരസ്യവുമായി നടക്കില്ല. ഈ കാലയളവിൽ യൂട്യൂബ് വിഡിയോകളിൽ തലയിൽ പരസ്യവുമായി പ്രത്യക്ഷപ്പെടണം.