മാഡ്രിഡ്: യുവേഫ ചാംപ്യന്‍സ് ലീഗില്‍ റൊണോള്‍ഡോയുടെ ഹാട്രിക്കില്‍ റയല്‍ സെമിയില്‍. ബയേണ്‍മ്യൂണിക്കിനെതിരേ രണ്ടാം പാദ ക്വാര്‍ട്ടറിലാണ് റൊണോള്‍ഡോയുടെ മികവില്‍ റയലിന്റെ സെമി പ്രവേശനം. ബയേണ്‍ മ്യൂണിക്കിനെ രണ്ടിനെതിരേ നാലു ഗോളുകള്‍ക്കാണ് റയല്‍ തറപ്പറ്റിച്ചത്. ഇതോടെ ഇരുപാദ മത്സരങ്ങളിലുമായി 6-3 ന്റെ ജയത്തോടെയാണ് റയലിന്റെ സെമി പ്രവേശനം.

എവേ മത്സരത്തില്‍ രണ്ടു ഗോളുകള്‍ നേടിയെന്ന ആത്മവിശ്വാസത്തിലാണ് റയല്‍ മാഡ്രിഡ് സാന്റിയാഗോ ബെര്‍ണാബുവില്‍ ഇറങ്ങിയത്. മത്സരത്തിന്റെ ആദ്യ പകുതിയില്‍ ഗോളുകളൊന്നും ഇരു ടീമുകള്‍ക്കും നേടാന്‍ കഴിഞ്ഞില്ല. രണ്ടാം പകുതിയില്‍ ആര്യന്‍ റോബനെ പെനാല്‍റ്റി ബോക്‌സില്‍ വീഴ്ത്തിയതിന് പെനാല്‍റ്റിയാണ് റെഫറി വിധിച്ചത്. പെനാല്‍റ്റി കിക്കെടുത്ത ലെവന്‍ഡോവ്‌സ്‌കി (53) ലക്ഷ്യം കണ്ടു. ഇതോടെ സമനിലയിലെത്താന്‍ ബയേണിനായി. ഇതിന് മറുപടിയായി റൊണാള്‍ഡോ 76ാം ഗോള്‍ നേടി റയലിന് ലീഡ് നല്‍കിയെങ്കിലും ക്യാപ്റ്റന്‍ റാമോസിന്റെ സെല്‍ഫ് ഗോളില്‍ ബയേണ്‍ ലീഡ് നേടി. 84ാം മിനുറ്റില്‍ ബയേണ്‍ സൂപ്പര്‍ താരം വിദാല്‍ ചുവപ്പ് കാര്‍ഡ് പുറത്തായതോടെ ബയേണ്‍ നിരയുടെ മുന്നേറ്റങ്ങള്‍ക്ക് വിറയല്‍ വന്നു.

മത്സരം അധികസമയത്തേക്ക് നീണ്ടതോടെ റയല്‍ തങ്ങളുടെ റിയല്‍ രൂപമെടുത്തു. 105, 110 മിനുറ്റുകളില്‍ റൊണാള്‍ഡോ ലക്ഷ്യം കണ്ടു. ആസെന്‍സിയോ 112ാം മിനുറ്റില്‍ ഗോള്‍ നേടി ഗോളുകളുടെ പട്ടിക പൂര്‍ത്തിയാക്കി. ഹാട്രിക് നേടിയ ക്രിസ്റ്റ്യാനോ റൊണാള്‍ഡോ ഒരു റെക്കോര്‍ഡിനു ഉടമയായി. ചാംപ്യന്‍സ് ലീഗില്‍ 100 ഗോള്‍ നേടുന്ന ആദ്യ താരമെന്ന നേട്ടവും താരം സ്വന്തമാക്കി.