സ്വന്തം ലേഖകന്‍
അഗളി : അട്ടപ്പാടി കുടുംബശ്രീ മിഷന്‍ പദ്ധതിയിലെ വന്‍ക്രമക്കേടുകള്‍ പുറത്തുവന്ന സാഹചര്യത്തില്‍ പദ്ധതി നടത്തിപ്പുമായി ബന്ധപ്പെട്ട പരാതികളില്‍ വിജിലന്‍സ് അന്വേണവും വകുപ്പ് തല അന്വേഷണവും ആവശ്യപ്പെട്ട് കുടുംബശ്രീമിഷന്‍ ഓഫിസിലേക്ക് ആദിവാസി സ്ത്രീകളുടെ വന്‍ റാലി. അഗളിയുടെ ചരിത്രത്തിലുണ്ടായിട്ടില്ലാത്ത ആദിവാസി പ്രതിഷേധ റാലിക്കാണ് അഗളി ഇന്നലെ സാക്ഷിയായത്.
കോടികള്‍ ചെലവഴിച്ച് നടപ്പാക്കിയ പദ്ധതികൊണ്ട് ചുരുക്കം ചില ആദിവാസികള്‍ക്കുമാത്രമാണ് ഗുണം ലഭിച്ചതെന്നും അവരാണ് കുടുംബശ്രീമിഷന്‍ സ്‌പെഷ്യല്‍ ഓഫീസറായിരുന്ന സീമാഭാസ്‌ക്കറെ അട്ടപ്പാടിയില്‍ തന്നെ നിലനിര്‍ത്തണമെന്നാവശ്യപ്പെട്ട് രംഗത്തുള്ളതെന്നും മഹാഭൂരിപക്ഷം ആദിവാസികളും പറയുന്നു. എന്നാല്‍ പദ്ധതി ആരുടേയും കുടുംബസ്വത്തല്ലെന്നും സര്‍ക്കാര്‍ പദ്ധതിയാണെന്നും, അഴിമതിക്കാരെ പുറത്താക്കിയ നടപടി സ്വാഗതം ചെയ്യുന്നുവെന്നും വിവിധ ആദിവാസി വിഭാഗങ്ങളുടെ നേതൃത്വത്തില്‍ രൂപീകരിച്ച ജനകീയ കുടുംബശ്രീ സംരക്ഷണസമിതി അംഗങ്ങള്‍ വ്യക്തമാക്കി.
അട്ടപ്പാടിയിലെ ആദിവാസികളെ രണ്ടുചേരിയില്‍ ആക്കിയതല്ലാതെ ഈ പദ്ധതികൊണ്ട് ഒരു ഗുണവും അവര്‍ക്ക് ലഭിച്ചിട്ടില്ല. ആദിവാസികള്‍ക്കിടയിലും കുടിയേറ്റക്കാര്‍ക്കിടയിലും ചേരിതിരിവുണ്ടാക്കുന്ന തരത്തിലുള്ള പ്രവര്‍ത്തനങ്ങള്‍ നടത്തുകയും യാതൊരു രേഖയുമില്ലാതെ പണം ചെലവഴിക്കുകയും ചെയ്തതിനെക്കുറിച്ചും വിശദമായ അന്വേഷണം നടത്തണമെന്ന് കുടുംബശ്രീ സംരക്ഷണ സമിതി നേതാക്കള്‍ ആവശ്യപ്പെട്ടു. മാര്‍ച്ച് നടത്തിയ സമരക്കാരെ ഓഫീസ് ഗേറ്റിന് മുന്നില്‍ പൊലിസ് തടഞ്ഞു. അതേസമയം സീമാഭാസ്‌ക്കറെ നിലനിര്‍ത്തണമെന്നാവശ്യപ്പെട്ട് ഏതാനും പേര്‍ ഓഫീസിനു പുറത്ത് സമരം തുടര്‍ന്നു.
ഇന്നലെ ഓഫിസിന്റെ പ്രവര്‍ത്തനം തടഞ്ഞ സീമാഭാസ്‌ക്കറുടെ അനുയായികള്‍ ഇന്ന് ഓഫീസിനകത്തേക്ക് കയറിയില്ല. എന്നാല്‍ ആദിവാസികള്‍ ചേരിതിരിഞ്ഞ് നടത്തുന്ന സമരങ്ങള്‍ക്കിടയിലൂടെ സീമാഭാസ്‌ക്കര്‍ നടന്നുപോയപ്പോള്‍ ആദിവാസികള്‍ നിസംഗതയോടെ നോക്കി നിന്നത് കൗതുകമായി.
ജനകീയ കുടുംബശ്രീ സംരക്ഷണ സമിതിയുടെ പ്രക്ഷോഭങ്ങള്‍ തുടരുമെന്നും പദ്ധതി കാര്യക്ഷമവും സുതാര്യവുമാക്കാനും തെരഞ്ഞെടുപ്പ് നടത്തി പുതിയ ഭാരവാഹികളെ കണ്ടെത്തണമെന്ന് സമരക്കാര്‍ ആവശ്യപ്പെട്ടു. ജില്ലാ പഞ്ചായത്തംഗം രാജന്‍, ശാന്താമണി കാരത്തൂര്‍, മരുതി, തങ്കമണി പ്രസംഗിച്ചു.