കല്‍പ്പറ്റ: കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി വയനാട്ടില്‍ മത്സരിക്കണമെന്ന് ആവശ്യപ്പെട്ട് എ.ഐ.സി.സിക്ക് വയനാട് ഡി.സി.സി സന്ദേശമയച്ചു. ഘടകകക്ഷികളുടെ സമ്മര്‍ദ്ദം ശക്തമായ സാഹചര്യത്തിലാണ് വയനാട്ടില്‍ മത്സരിക്കേണ്ട എന്ന തീരുമാനത്തില്‍ രാഹുല്‍ ഗാന്ധി എത്തിയതെന്ന വിവരവുമുണ്ട്.

അതേസമയം രാഹുല്‍ കര്‍ണാടകയില്‍ മത്സരിക്കണോ എന്ന കാര്യത്തില്‍ ചര്‍ച്ച സജീവമായിരിക്കുകയാണ്. രാഹുല്‍ വയനാട്ടില്‍ മത്സരിക്കേണ്ടതില്ല എന്ന ശക്തമായ നിലപാടാണ് ഘടകകക്ഷികള്‍ സ്വീകരിച്ചിരിക്കുന്നത്. എന്‍.സി.പി മുതിര്‍ന്ന നേതാവ് ശരത് പവാറാണ് ഇക്കാര്യത്തില്‍ ശക്തമായ സമ്മര്‍ദ്ദം ചെലുത്തുന്നത്. ഇതുമായി ബന്ധപ്പെട്ട് ഹൈക്കമാന്‍ഡ് നേതാക്കളെ ശരത് പവാര്‍ ഫോണില്‍ ബന്ധപ്പെട്ടു. രാഹുല്‍ ഗാന്ധി വയനാട്ടില്‍ മത്സരിക്കരുതെന്ന ആവശ്യം ശരത് പവാര്‍ ഹൈക്കമാന്‍ഡിന് മുന്‍പാകെ വച്ചതായാണ് വിവരം. ഇത്തരത്തില്‍ വലിയ രീതിയില്‍ സമ്മര്‍ദ്ദം ഉയര്‍ന്ന പശ്ചാത്തലത്തില്‍ വയനാട്ടില്‍ മത്സരിക്കേണ്ടതില്ല എന്ന ധാരണയില്‍ രാഹുല്‍ എത്തിയതായാണ് വിവരം. രാഹുല്‍ ഗാന്ധി വയനാട്ടില്‍ മത്സരിക്കുമെന്ന് പറഞ്ഞിട്ടില്ലെന്ന് വ്യക്തമാക്കി ഉമ്മന്‍ ചാണ്ടി രംഗത്തെത്തിയിരുന്നു. രാഹുല്‍ കേരളത്തില്‍ മത്സരിക്കുമെന്ന ഒരു സൂചന പോലും താന്‍ നല്‍കിയിട്ടില്ലെന്നും മത്സരിക്കണമെന്ന ആവശ്യമാണ് മുന്നോട്ടുവച്ചതെന്നും ഉമ്മന്‍ചാണ്ടി പറഞ്ഞിരുന്നു. രാഹുല്‍ വയനാട്ടില്‍ മത്സരിക്കുന്ന കാര്യത്തില്‍ ഉടന്‍ തീരുമാനമുണ്ടാകുമെന്നാണ് പ്രതീക്ഷയെന്നും ഉമ്മന്‍ചാണ്ടി വ്യക്തമാക്കിയിരുന്നു. അതേസമയം വയനാട് ഉറച്ച യു.ഡി.എഫ് മണ്ഡലമാണന്നും ഹൈക്കമാന്‍ഡിന്റെ തീരുമാനം എന്തു തന്നെയായാലും അംഗീകരിക്കുമെന്നും ഡി.സി.സി പ്രസിഡന്റ് ഐ.സി ബാാലകൃഷ്ണന്‍ എം.എല്‍.എ പറഞ്ഞു.