കൂറ്റനാട്: പട്ടാമ്പി പെരുമ്പിലാവ് സംസ്ഥാന പാതയരികില്‍ കൂറ്റനാട് പെട്രോള്‍ പമ്പിന് എതിര്‍വശം പ്രവര്‍ത്തിക്കുന്ന മാനുക്കാസ് സൂപ്പര്‍ മാര്‍ക്കറ്റില്‍ വന്‍ തീപിടിത്തം. ഇന്നലെ രാത്രി ഏഴു മണിയോടെയാണ് തീപിടുത്തമുണ്ടായത്. തീ പിടിക്കാന്‍ ഉണ്ടായ കാരണം വ്യക്തമായിട്ടില്ല. ബില്‍ഡിങ്ങിന്റെ രണ്ടാം നിലയിലാണ് ആദ്യം തീ പിടിത്തമുണ്ടായത്. ഗുരുവായൂര്‍ റോഡിലുള്ള ഇന്ത്യന്‍ ഓയില്‍ പമ്പിന്റെ മുന്‍വശത്തുള്ള മാനുക്കാസ് സൂപ്പര്‍മാര്‍ക്കറ്റ് ആണ് തീപ്പിടിച്ചത്.
കോടികണക്കിന് രൂപയുടെ നാശനഷ്ട്ടമുണ്ടായതായാണ് പ്രാഥമിക റിപ്പോര്‍ട്ട്. മൂന്ന് നില പൂര്‍ണമായും കത്തി ചാമ്പലായി. ഷൊര്‍ണൂര്‍, കുന്നംകുളം എന്നിവിടങ്ങളില്‍ നിന്നും ഫയര്‍ഫോഴ്‌സും തൃത്താല, ചാലിശ്ശേരി പൊലിസ് സ്റ്റേഷനിലെ പൊലിസുകാരും നാട്ടുകാരും ചേര്‍ന്ന് മണിക്കൂറുകളോളം നടത്തിയ പരിശ്രമങ്ങള്‍ക്കൊടിവിലാണ് തീ അണക്കാന്‍ സാധിച്ചത്.