കാസര്‍കോട്: മേല്‍പറമ്പ് കട്ടക്കാലില്‍ അപകടം വരുത്തിയ കാറില്‍നിന്ന് പൊലിസ് ഹാഷിഷ് ഓയില്‍ പിടികൂടി. കാര്‍ ഡ്രൈവര്‍ അടക്കം മൂന്നുപേരെ അറസ്റ്റ് ചെയ്തു. കണ്ണൂര്‍ അഴിക്കോട് സ്വദേശി സഫ്‌വാന്‍(25), പള്ളിക്കരയിലെ ടി.എ അഷ്‌റഫ്(36), പൂച്ചക്കാട്ടെ ഇല്യാസ് (30) എന്നിവരെയാണ് പൊലിസ് അറസ്റ്റ് ചെയ്തത്.
കഴിഞ്ഞ ദിവസം കെ.എസ്.ടി.പി റോഡില്‍ കട്ടക്കാലില്‍ സഫ്‌വാന്‍ ഓടിച്ചു വരുകയായിരുന്ന കാര്‍ സ്‌കൂട്ടറിലിടിക്കുകയായിരുന്നു. സ്‌കൂട്ടറില്‍ സഞ്ചരിക്കുകയായിരുന്ന ഷഹബാസ് കോളിയാട്, പെരിയ പോളിടെക്‌നിക്ക് വിദ്യാര്‍ഥി മേല്‍പറമ്പ് നടക്കാലിലെ ശ്രീജന്‍ എന്നിവര്‍ക്ക് പരുക്കേറ്റിരുന്നു. 5.8ഗ്രാം ഹാഷിഷാണ് കണ്ടെടുത്തത്. ഡ്രൈവര്‍ക്കെതിരേ അപകടം വരുത്തിയതിനും ഹാഷിഷ് കടത്തിയതിനും കേസെടുത്തു.