ചെറുവത്തൂര്‍: ജില്ലയില്‍ പ്രൈമറി അധ്യാപക മേഖലയില്‍ റെക്കോര്‍ഡ് ഒഴിവുകള്‍. എല്‍.പി.എസ്.ടി നാനൂറിലധികം ഒഴിവുകളാണ് നിലവിലുള്ളത്. നേരത്തെ 357 എല്‍.പി അധ്യാപക ഒഴിവുകളാണ് റിപോര്‍ട്ട് ചെയ്തിരുന്നത്.
എന്നാല്‍ കഴിഞ്ഞ ദിവസം 47 ഒഴിവുകള്‍ കൂടി റിപോര്‍ട്ട് ചെയ്തു. യു.പി വിഭാഗത്തില്‍ 91 ഒഴിവുകളാണ് നേരത്തെ ഉണ്ടായിരുന്നത്. എന്നാല്‍ കഴിഞ്ഞ ദിവസം 30 ഒഴിവുകള്‍ കൂടി റിപോര്‍ട്ട് ചെയ്തു.
വിദ്യാഭ്യാസ ഉപഡയറക്ടറുടെ കാര്യാലയത്തില്‍ നിന്ന് അതിവേഗം ഒഴിവുകള്‍ റിപോര്‍ട്ട് ചെയ്യുന്നുണ്ട്. ഏപ്രില്‍, മെയ് മാസങ്ങളിലെ വിരമിക്കല്‍ ഒഴിവുകള്‍ കൂടി റിപോര്‍ട്ട് ചെയ്യുമ്പോള്‍ ഒഴിവുകള്‍ ഇനിയും വര്‍ധിക്കും.
അതേസമയം ഈ ഒഴിവുകളിലേക്കുള്ള പി.എസ്.സി നിയമന ശുപാര്‍ശ ഏപ്രില്‍ അവസാനത്തോടെ അയക്കുമെന്നാണ് പി.എസ്.സി ഓഫിസില്‍നിന്ന് അറിയിച്ചിരിക്കുന്നത്. നിലവിലുള്ള അധ്യാപകരുടെ ട്രാന്‍സ്ഫര്‍ നടപടികള്‍ പൂര്‍ത്തിയാവാത്തതാണ് നിയമന ശുപാര്‍ശ വൈകാന്‍ കാരണമെന്ന് സൂചനയുണ്ട്. ഏപ്രില്‍ അവസാനത്തോടെയാണ് നിയമന ശുപാര്‍ശ ലഭിക്കുന്നതെങ്കില്‍ ജൂണ്‍, ജൂലൈ മാസങ്ങളില്‍ മാസമേ പി.എസ്.സി റാങ്ക് ലിസ്റ്റില്‍ ഉള്ളവര്‍ക്ക് നിയമന ഉത്തരവ് ലഭിക്കുകയുള്ളൂ.
എല്‍.പി.എസ്.ടി, യു.പി.എസ്.ടി റാങ്ക് ലിസ്റ്റില്‍ നിന്നുള്ള നിയമനങ്ങള്‍ നേരത്തെ കോടതി നടപടികളില്‍ കുടുങ്ങി കിടക്കുകയായിരുന്നു. ഹൈക്കോടതി ഇതുമായി ബന്ധപ്പെട്ട് നിലനിന്നിരുന്ന സ്റ്റേ നീക്കിയതോടെയാണ് നിയമന ശുപാര്‍ശയ്ക്കുള്ള നടപടികള്‍ ആരംഭിച്ചത്. റിപോര്‍ട്ട് ചെയ്ത മുഴുവന്‍ ഒഴിവുകളിലേക്കും ഒരുമിച്ച് നിയമന ശുപാര്‍ശ അയക്കാനുള്ള ശ്രമങ്ങളാണ് പി.എസ്.സി നടത്തുന്നത്.
അങ്ങനെയെങ്കില്‍ എല്‍.പി.എസ്.ടി റാങ്ക് ലിസ്റ്റിലുള്ള ഭൂരിപക്ഷം പേര്‍ക്കും ജൂണ്‍, ജൂലൈ മാസങ്ങളില്‍ നിയമനം ലഭിച്ചേക്കും.