പാല്‍മ ഡി മല്ലോര്‍ക്ക: മൂന്ന് മാസത്തെ ലോക്ക് ഡൗണിനെ തുടര്‍ന്ന് കളിക്കാന്‍ കഴിയാത്തതിന്റെ അരിശം മെസ്സിയും കൂട്ടരും ഇന്നലെയങ്ങ് തീര്‍ത്തു. ലാലിഗയില്‍ മല്ലോര്‍ക്കയുടെ തട്ടകത്ത് ചെന്ന് അവരെ നാലു ഗോളില്‍ നിലംപരിശാക്കിയാണ് ബാഴ്‌സ ക്ലബ്ബിലേക്ക് തിരിച്ചത്. പ്രതിരോധവും ഉണര്‍ന്നു കളിച്ചതോടെ ഗോള്‍ വഴങ്ങുന്നതിലും സെറ്റിയന്റെ ശിശ്യര്‍ മിടുക്കു കാട്ടി. സൂപ്പര്‍ താരം മെസ്സിയുടെ ഒരു ഗോളും രണ്ട് അസിസ്റ്റും ടീമിന്റെ വിജയത്തില്‍ മാറ്റ് കൂട്ടി. 

പരുക്കിനെ തുടര്‍ന്ന് ശസ്ത്രക്രിയ കഴിഞ്ഞ് തിരിച്ചെത്തിയ സുവാരസിനെ ബെഞ്ചിലിരുത്തി മെസ്സി-ഗ്രീസ്മാന്‍-ബ്രാത്‌വെയ്റ്റ് ത്രയത്തെ കളത്തിലിറക്കിയാണ് കോച്ച് ക്വിക്കെ സെറ്റിയന്‍ തന്ത്രം മെനഞ്ഞത്. പോസ്റ്റിന് താഴെ ടെര്‍സ്റ്റിഗന്റെ സ്‌പൈഡര്‍മാന്‍ ഡൈവുകളും ബാഴ്‌സയുടെ 

പോരാട്ടത്തിന് ആത്മവീര്യമേറി. 

കളി തുടങ്ങി രണ്ടാം മിനുട്ടില്‍ തന്നെ വിദാലാണ് ഗോള്‍വേട്ടയ്ക്ക് തിരികൊളുത്തിയത്. തുടര്‍ന്ന് മെസ്സിയുടെ ഒന്നാന്തരമൊരു പാസിലൂടെ ഗോള്‍ കണ്ടെത്തി മാര്‍ട്ടിന്‍ ബ്രാത്‌വെയ്റ്റ് ഗോള്‍ നേട്ടം രണ്ടാക്കി. 57ാം മിനുട്ടില്‍ ഗ്രീസ്മാനെ വിളിച്ച് പകരം സുവാരസി

ന് അവസരം നല്‍കിയെങ്കിലും ലക്ഷ്യത്തിലേക്ക് തൊടുക്കാന്‍ കഴിഞ്ഞില്ല. 73ാം മിനുട്ടില്‍ മെസ്സി വഴി ജോര്‍ഡി ആല്‍ബ കൂടി എതിര്‍ വല കുലുക്കിയതോടെ ടീമിന്റെ വിജയം സുനിശ്ചിതമായി. മത്സരം അവസാനിക്കാന്‍ നിമിഷങ്ങള്‍ ബാക്കി നില്‍ക്കേ രണ്ട് പ്രതിരോധ താരത്തെ മറികടന്ന് മെസി ഗോള്‍നേട്ടം നാലില്‍ അവസാനിപ്പിച്ചു. ജയത്തോടെ ബാഴ്‌സ ഒന്നാംസ്ഥാനം ഒന്നുകൂടി ഉറപ്പിച്ചു. 61 പോയിന്റാണ് ടീമിനുള്ളത്. രണ്ടാമതുള്ള റയലിന് 56 പോയിന്റുണ്ട്.