അഞ്ചാലുമ്മൂട്: അയല്‍വാസി മതില്‍കെട്ടിയതോടെ വീതികുറഞ്ഞ ഇടവഴിയിലൂടെ ഷിബിനയുടെ യാത്ര സര്‍വ ദുരിതവും പേറി. പെരിനാട് ഞാറയ്ക്കല്‍ ഷിബിനാ മന്‍സിലില്‍ വിമുക്തഭടന്‍ സഹറുദ്ദീന്റെയും ഐഷാബീവിയുടെയും മകള്‍ ഷിബിനക്കാ(21)ണ് ദുരിതപാത താണ്ടി പുറംലോകത്തെത്തേണ്ടത്. സെറിബ്രല്‍ പാല്‍സി എന്ന അസുഖമാണ് ഷിബിനക്ക്. നാലുവയസിനു ശേഷമാണ് അസുഖം കണ്ടുതുടങ്ങിയത്. സംസാരിക്കാമെങ്കിലും പരസഹായമില്ലാതെ പ്രാഥമികകാര്യങ്ങള്‍പോലും ചെയ്യാനാകാത്ത അവസ്ഥയാണ്. ഷിബിനയുടെ മാതാവാണ് ദൈനംദിന കാര്യങ്ങള്‍ നോക്കുന്നത്. നാലുവര്‍ഷത്തോളമായി അയല്‍വാസി ഇവിടെ മതില്‍കെട്ടിയിട്ട്.
സാധാരണ വീല്‍ച്ചെയര്‍ ഇതുവഴി കഷ്ടിച്ചു ഉരുട്ടിക്കൊണ്ടുപോകാമെങ്കിലും വീലുകളും ഹാന്‍ഡിലും മതിലിന്റെ വശങ്ങളില്‍ തട്ടി പെട്ടെന്ന് കേടാകുന്നതാണ് പതിവ്. രണ്ടുപേര്‍ ഏറെനേരം പണിപ്പെട്ടുവേണം ഇതുവഴി കൊണ്ടുപോകാനും. ഇതുമൂലം ആശുപത്രിയിലും മറ്റും എത്തിക്കാന്‍ നന്നേ ബുദ്ധിമുട്ടുന്ന അവസ്ഥയാണുള്ളത്. പ്രധാനറോഡില്‍ നിന്നും കേവലം ഇരുപതുമീറ്ററോളം ദൂരം മാത്രമുള്ളപ്പോയാണ് കുടുംബം ഈ ദുരിതമനുഭവിക്കുന്നത്.
തൃക്കരുവ പഞ്ചായത്ത് അധികൃതര്‍ക്ക് പരാതി നല്‍കിയെങ്കിലും ഫലമുണ്ടായില്ലെന്നു സഹറുദ്ദീന്‍ പറഞ്ഞു. മകളുടെ അവസ്ഥയില്‍ വേദനിക്കുന്ന തങ്ങള്‍ക്ക് ഇനി ആത്മഹത്യയല്ലാതെ മറ്റുമാര്‍ഗ്ഗമില്ലെന്നും അദ്ദേഹം പറഞ്ഞു. ബി.ബി.എക്കു പഠിക്കുന്ന ഷിബിന്‍ഷായാണ് ഷിബിനയുടെ ഏക സഹോദരന്‍.