ആറ്റിങ്ങല്‍: കാറും ടാങ്കര്‍ ലോറിയും കൂട്ടിയിടിച്ച് മൂന്നുപേര്‍ മരിച്ചു. അഞ്ചുപേര്‍ക്ക് ഗുരുതരമായി പരുക്കേറ്റു.
ദേശീയപാതയില്‍ ആറ്റിങ്ങല്‍ ടി.ബി ജങ്ഷനില്‍ ഞായറാഴ്ച പുലര്‍ച്ചെ 12ഓടെയായിരുന്നു അപകടം. തിരുവനന്തപുരം ഭാഗത്തുനിന്ന് വരികയായിരുന്ന കാറും എതിര്‍ദിശയിലെത്തിയ ടാങ്കര്‍ ലോറിയും നേര്‍ക്കുനേര്‍ കൂട്ടിയിടിക്കുകയായിരുന്നു.
കാറിലുണ്ടായിരുന്ന കല്ലുവാതുക്കല്‍ സജ്‌ന മന്‍സിലില്‍ നാസര്‍, അബുസ ബീവി ദമ്പതികളുടെ മകന്‍ അസീം നാസര്‍ (32).
കല്ലുവാതുക്കല്‍ മനേഷ് ഭവനില്‍ മണികണ്ഠന്‍ പിള്ള, വിജയകുമാരി ദമ്പതികളുടെ മകന്‍ മനേഷ് (29), കല്ലുവാതുക്കല്‍ നടയ്ക്കല്‍ അടുതലയിലെ കുഞ്ഞുരാമക്കുറുപ്പ്, രാഗിണി ദമ്പതികളുടെ മകന്‍ പ്രിന്‍സ് (35) എന്നിവരാണ് മരിച്ചത്. അഖില്‍, വിനീത്, വിപിന്‍, സുബിന്‍, മഹേഷ് എന്നിവരാണ് ഗുരുതര പരുക്കുകളോടെ മെഡിക്കല്‍ കോളജ് ആശുപത്രിയിലുള്ളത്.
വിവാഹപ്പാര്‍ട്ടി സഞ്ചരിച്ച കാറാണ് അപകടത്തില്‍പ്പെട്ടത്. കാര്‍ പൂര്‍ണമായും തകര്‍ന്നു. റോഡിലെ ഗട്ടര്‍ കണ്ട് ലോറി ഡ്രൈവര്‍ വാഹനം വെട്ടിച്ചതാണ് അപകടത്തിന് കാരണമെന്നാണ് പ്രാഥമിക നിഗമനം. കല്ലുവാതുക്കല്‍ അസാറ ഹൈപ്പര്‍മാര്‍ക്കറ്റ് ഉടമയാണ് അസീം നാസര്‍. ഭാര്യ: റസീന. മകള്‍: അസാറ. സഹോദരി: സജ്‌ന. മനേഷിന്റെ സഹോദരന്‍ മനു. പ്രിന്‍സിന്റെ സഹോദരി പ്രിന്‍സി.