മ്യൂണിക്ക്: ബയേണ്‍ മ്യൂണിക്കിന്റെ ഗോള്‍ കീപ്പര്‍ മാനുവല്‍ നൂയര്‍ക്ക് ഈ സീസണ്‍ നഷ്ടമാകും. ഇടതുകാലിനേറ്റ പരുക്കാണ് താരത്തിന് തിരിച്ചടിയായിരിക്കുന്നത്. ചാംപ്യന്‍സ് ലീഗില്‍ റയലിനെതിരായ മത്സരത്തിലാണ് താരത്തിന് പരുക്കേറ്റത്.
മത്സരത്തിന്റെ അധികസമയത്താണ് താരത്തിന് പരുക്കേറ്റത്. നേരത്തെ പരിശീലനത്തിനിടെയുണ്ടായ പരുക്കിനെ തുടര്‍ന്ന് മാര്‍ച്ച് 29ന് താരത്തെ ശസ്ത്രക്രിയക്ക് വിധേയനാക്കിയിരുന്നു. ഇതിന് പിന്നാലെയാണ് വീണ്ടും പരുക്കേല്‍ക്കുന്നത്. നൂയറുടെ പരുക്ക് ഗുരുതരമാണ്. എട്ടാഴ്ച്ചയോളം അദ്ദേഹത്തിന് കളിക്കാനാവില്ലെന്ന് ക്ലബ് ചെയര്‍മാന്‍ കാള്‍ ഹെയ്ന്‍സ് റുമെനിഗെ വ്യക്തമാക്കി. ബുണ്ടസ് ലീഗയില്‍ ഈ സീസണില്‍ അഞ്ചു മത്സരങ്ങളാണ് ബയേണിന് ബാക്കിയുള്ളത്. ജര്‍മന്‍ കപ്പിന്റെ സെമി ഫൈനലാണ് താരത്തിന് നഷ്ടമാകുന്ന പ്രധാന മത്സരം. സ്വെന്‍ യുലെറിച്ചാണ് നൂയര്‍ക്ക് പകരം വലകാക്കുക.