കോഴിക്കോട്: കൊവിഡ് ഭീതിയില്‍ എങ്ങനെയെങ്കിലും നാടണയാന്‍ കാത്തുനില്‍ക്കുന്ന പ്രവാസികളുടെ മനുഷ്യാവകാശം പോലും ചോദ്യം ചെയ്യുന്ന രീതിയിലാണ് കേരള സര്‍ക്കാര്‍ പെരുമാറുന്നതെന്നും നാടിനുവേണ്ടി കഷ്ടപ്പെട്ട അവരെ പ്രതിസന്ധിയില്‍ പുറംതള്ളുന്ന ക്രൂരത അവസാനിപ്പിക്കണമെന്നും വനിതാ ലീഗ് സംസ്ഥാന കമ്മിറ്റി. പ്രവാസികള്‍ നാടിന്റെ നട്ടെല്ലാണെന്ന് പ്രസ്താവനയിറക്കുന്നവര്‍ അവരുടെ ദുരിതം കണ്ടുകൊണ്ടാണ് നിലപാട് സ്വീകരിക്കേണ്ടത്. വിമാനം കയറും മുന്‍പ് കൊവിഡ് ടെസ്റ്റ് നടത്തുക എന്നത് എല്ലാ രാജ്യത്തുമുള്ള പ്രവാസികള്‍ക്കും സാധ്യമായ കാര്യമല്ല. നൂറുകണക്കിന് മലയാളികളാണ് ഗള്‍ഫില്‍ കൊവിഡ് ബാധിച്ച് മരിച്ചുകൊണ്ടിരിക്കുന്നത്. അവരെക്കുറിച്ച് ഒന്നു പരാമര്‍ശിക്കാനോ അവരുടെ കുടുംബങ്ങളെ ആശ്വസിപ്പിക്കുന്ന സഹായധനം പ്രഖ്യാപിക്കാനോ സര്‍ക്കാര്‍ മുതിര്‍ന്നിട്ടില്ല. അതിനിടയിലാണ് അവരെ ദ്രോഹിക്കുന്ന ഇത്തരം നടപടികള്‍. ഈ ക്രൂരത ഉടന്‍ അവസാനിപ്പിക്കണമെന്ന് വനിതാ ലീഗ് ആവശ്യപ്പെട്ടു. സംസ്ഥാന പ്രസിഡന്റ് സുഹറ മമ്പാട് അധ്യക്ഷത വഹിച്ച ഓണ്‍ലൈന്‍ യോഗത്തില്‍ തദ്ദേശ തെരഞ്ഞെടുപ്പ് മുന്നൊരുക്കങ്ങളുടെ രൂപരേഖ ജനറല്‍ സെക്രട്ടറി അഡ്വ. പി. കുല്‍സു അവതരിപ്പിച്ചു. ഭാരവാഹികളായ സീമ യഹിയ, ശാഹിന നിയാസി, ആയിശ താഹിറ, പി.സഫിയ, ബീഗം സാബിറ, റോഷിനി ഖാലിദ്, സറീന ഹസീബ്, അഡ്വ. സാജിദ സിദ്ദീഖ്, ബ്രസീലിയ ശംസുദ്ദീന്‍, സബീന മടപ്പള്ളി ചര്‍ച്ചയില്‍ പങ്കെടുത്തു.