കാസര്‍കോട്: മദ്‌റസ അധ്യാപകനെ കൊലപ്പെടുത്തിയ കേസിലെ രണ്ടു പ്രതികളെ മറ്റൊരു കേസില്‍ കാസര്‍കോട് ടൗണ്‍ പൊലിസ് അറസ്റ്റ് രേഖപ്പെടുത്തി. കേളുഗുഡൈ അയ്യപ്പ നഗര്‍ ഭജന മന്ദിരത്തിനു സമീപത്തെ അജേഷ് എന്ന അപ്പു, കേളുഡുഡൈയിലെ നിതിന്‍ എന്നിവരുടെ അറസ്റ്റാണ് എസ്.ഐ വി മോഹനന്‍ രേഖപ്പെടുത്തിയത്.
കഴിഞ്ഞ ദിവസം കാസര്‍കോട് ഒന്നാം ക്ലാസ് മജിസ്‌ട്രേറ്റ് കോടതിയില്‍ ഹാജരാക്കിയപ്പോഴാണ് കോടതി അനുമതിയോടെ പ്രതികളുടെ അറസ്റ്റ് രേഖപ്പെടുത്തിയത്. പഴയ ചൂരിയിലെ അബ്ദുല്‍ കാസിഫ് ഫര്‍സാനെ (19) മദ്യകുപ്പി കൊണ്ട് തലക്കടിച്ചു പരുക്കേല്‍പ്പിച്ച കേസിലാണ് അറസ്റ്റ് രേഖപ്പെടുത്തിയത്. 2016 ജൂണ്‍ ഏഴിനു രാത്രി എട്ടിന് ചൂരി ബട്ടംപാറ റോഡില്‍ വച്ച് സ്‌കൂട്ടറിലെത്തിയ പ്രതികള്‍ അക്രമിക്കുകയായിരുന്നു.
റിയാസ് മുസ്‌ലിയാരെ കൊലപ്പെടുത്തിയതിന് അറസ്റ്റിലായ പ്രതികളെ ചോദ്യം ചെയ്തപ്പോഴാണ് ഈ കേസ് തെളിഞ്ഞത്. ഈ കേസില്‍ വധശ്രമം അടക്കമുള്ള വകുപ്പുകള്‍ പ്രതികള്‍ക്കെതിരേ ചുമത്തിയിട്ടുണ്ട്. പ്രതികള്‍ക്കെതിരേ വേറെയും നിരവധി കേസുകള്‍ ചുമത്തപ്പെട്ടിട്ടുണ്ട്.