മാനന്തവാടി: വിഷു, ഈസ്റ്റര്‍ ഉള്‍പ്പെടെയുള്ള അവധി ദിനങ്ങളില്‍ ജില്ലയിലെ നാല് ബീവറേജസ് ഔട്ട്‌ലെറ്റുകള്‍ വിറ്റഴിച്ചത് മൂന്നുകോടിയിലധികം രൂപയുടെ വിദേശമദ്യം.
വിഷുവിന്റെ തലേദിവസമായി 13നും ഈസ്റ്റര്‍ തലേദിവസമായ 15നും ജില്ലയില്‍ വില്‍പന നടത്തിയത് മൂന്ന് കോടി ഇരുപത്തിമൂന്ന് ലക്ഷത്തിന്റെ മദ്യമാണെന്നാണ് കണക്കുകള്‍. സുല്‍ത്താന്‍ ബത്തേരി ഔട്ട്‌ലറ്റില്‍ വിഷുവിന് 69 ലക്ഷവും ഈസ്റ്ററിന് 42 ലക്ഷവും വില്‍പന നടന്നു.
മാനന്തവാടിയില്‍ വിഷുവിന് 67 ലക്ഷം, ഈസ്റ്ററിന് 40 ലക്ഷം, അമ്പലവയലില്‍ വിഷുവിന് 33 ലക്ഷം, ഈസ്റ്ററിന് 28 ലക്ഷം, പുല്‍പ്പള്ളിയില്‍ വിഷുവിനും ഈസ്റ്ററിനും 22 ലക്ഷം വീതം എന്നിങ്ങനെയായിരുന്നു മദ്യവില്‍പന. മാറ്റി സ്ഥാപിക്കപ്പെട്ട വൈത്തിരി, പനമരം ബീവറേജസുകള്‍ ഹൈക്കോടതി വിധിയെ തുടര്‍ന്ന് അടച്ചതിനാല്‍ ഉത്സവക്കച്ചവടം നടത്താന്‍ കഴിഞ്ഞില്ല.
പൊതുമരാമത്ത് വകുപ്പുമായി നടത്തിയ ഒത്തുകളിയെ തുടര്‍ന്ന് അടച്ചു പൂട്ടിയ ശേഷം വീണ്ടും തുറന്ന മാനന്തവാടി എരുമത്തെരുവിലെ രണ്ട് ബിയര്‍ വൈന്‍ പാര്‍ലറുകളിലും ആഘോഷവുമായി ബന്ധപ്പെട്ട് നല്ലരീതിയിലുള്ള കച്ചവടമാണ് നടന്നത്.