ഒറ്റപ്പാലം: എന്‍.എസ്.എസ് കോളജില്‍ വിദ്യാര്‍ഥി സംഘടനകള്‍ തുടര്‍ച്ചയായി സൃഷ്ടിക്കുന്ന പ്രശ്‌നങ്ങളെ തുടര്‍ന്ന് കോളജ് അനിശ്ചിത കാലത്തേക്ക് അടച്ചിടാന്‍ കോളജ് കൗണ്‍സിലില്‍ തീരുമാനം. കൊടിമരം സ്ഥാപിക്കലും കോളജിനകത്തെ കൊടിതോരണങ്ങള്‍ മാറ്റാത്തതും കാരണമായി കണ്ടാണ് പരിഹാരമാകുംവരെ കോളജ് അടച്ചിടാന്‍ തീരുമാനിച്ചതെന്ന് പ്രിന്‍സിപ്പല്‍ അറിയിച്ചു. കഴിഞ്ഞ കുറച്ച് കാലങ്ങളായി ക്യാംപസില്‍ കൊടിമരം സ്ഥാപിക്കലും ആയി ബന്ധപ്പെട്ട് പ്രശ്‌നങ്ങളുണ്ടായിട്ടുണ്ടെന്നും അത് ആവര്‍ത്തിക്കാതിരിക്കാനാണ് ശ്രമമെന്നും പ്രിന്‍സിപ്പല്‍ പറഞ്ഞു. ബുധനാഴ്ച രാവിലെ കോളജിനകത്ത് അഭിമന്യുവിന്റെ കൊലപാതകത്തില്‍ പ്രതിഷേധിച്ച് എസ്.എഫ്.ഐ താല്‍കാലിക രക്തസാക്ഷി സ്തൂപം സ്ഥാപിക്കുകയും പ്രകടനം നടത്തുകയും ചെയ്തിരുന്നു. വിദ്യാഭ്യാസ ബന്ദിന്റെ ഭാഗമായി കെ.എസ്.യുവും പ്രകടനവും നടത്തിയിരുന്നു. ഇതേ തുടര്‍ന്ന് മറ്റ് അനിഷ്ടസംഭവങ്ങള്‍ ഇല്ലാതിരിക്കാന്‍ മുന്‍കരുതലെന്ന നിലക്ക് കോളേജ് വിടുകയും പൊലിസിനെ അറിയിക്കുകയുംചെയ്തു. ശേഷം നടന്ന കോളജ് കൗണ്‍സിലിലാണ് അനിശ്ചിതകാലത്തേക്ക് അടച്ചിടാന്‍ തീരുമാനിച്ചതെന്ന് കോളജ് പ്രിന്‍സിപ്പാള്‍ പറഞ്ഞു.