തൊടുപുഴ: ലോക്‌സഭാ മണ്ഡലത്തിലെ മൂന്നാംഘട്ട പര്യടനം പൂര്‍ത്തിയാക്കി യു.ഡി.എഫ് സ്ഥാനാര്‍ഥി ഡീന്‍ കുര്യാക്കോസ് ജനമനസുകള്‍ കീഴടക്കി മുന്നേറുന്നു. കടുത്ത വേനല്‍ ചൂടു പോലും അവഗണിച്ചു കൊണ്ട് ഓരോ മേഖലയിലും നൂറു കണക്കിനാളുകളാണ് സ്ഥാനാര്‍ഥിക്ക് സ്വീകരണം നല്‍കാന്‍ കാത്തു നില്‍ക്കുന്നത്.
വൈകിയാണ് സ്ഥാനാര്‍ഥി എത്തിയതെങ്കിലും പ്രവര്‍ത്തനത്തില്‍ വളരെയേറെ ആവേശത്തിലാണ് ഇടുക്കി പാര്‍ലമെന്റ് മണ്ഡലത്തിലെ യു.ഡി.എഫ് നേതാക്കളും പ്രവര്‍ത്തകരും. ഇടുക്കി, ദേവികുളം, ഉടുമ്പന്‍ചോല, കോതമംഗലം, മൂവാറ്റുപുഴ, തൊടുപുഴ, പീരുമേട്എന്നീ നിയോജകമണ്ഡലം കണ്‍വെന്‍ഷനുകള്‍ പൂര്‍ത്തീകരിച്ച് പ്രദേശത്തുള്ള ആളുകളെ കാണുന്ന തിരക്കിലാണ് ഡീന്‍ കുര്യാക്കോസ്. നാളെ, ഏപ്രില്‍ ഒന്ന്, രണ്ട് തീയതികളില്‍ ആയി ഒന്നാംഘട്ട ഫീല്‍ഡ് വര്‍ക്ക് പൂര്‍ത്തിയാകും. അഞ്ച്, ആറ്, ഏഴ് തീയതികളില്‍ പാര്‍ലമെന്റ് മണ്ഡലത്തില്‍ കുടുംബയോഗങ്ങള്‍ പൂര്‍ത്തീകരിക്കും.
ഏപ്രില്‍ ഒന്‍പത്, 10 തീയതികളില്‍ രണ്ടാംഘട്ട സ്‌ക്വാഡ് യുഡിഎഫിന് അഭ്യര്‍ഥനയുമായി സമ്മതിദായകരെ സമീപിച്ച് രണ്ടാംഘട്ട ഫീല്‍ഡ് വര്‍ക്ക് പൂര്‍ത്തിയാക്കും.. ഏപ്രില്‍ 15 ,20 തീയതികളില്‍ മണ്ഡലത്തിലെമ്പാടും കോര്‍ണര്‍ മീറ്റിങ്ങുകള്‍ നടത്തും. ഏപ്രില്‍ 16 മുതല്‍ 20 വരെ മൂന്നാംഘട്ട സ്‌ക്വാഡ് പ്രവര്‍ത്തനങ്ങള്‍ ക്ലിപ്പുകളും മാതൃക ബാലറ്റ് നല്‍കി യു.ഡി.എഫ് പൂര്‍ത്തിയാക്കും.