തിരുവനന്തപുരം: വിദ്യാര്‍ഥിയായിരിക്കുമ്പോള്‍ തന്നെ അത്ഭുതപ്പെടുത്തിയ നേതാവായിരുന്നു കെ. കരുണാകരനെന്ന് മുസ്്‌ലിം ലീഗ് അഖിലേന്ത്യാ ജനറല്‍ സെക്രട്ടറി പി.കെ കുഞ്ഞാലിക്കുട്ടി. കെ. കരുണാകരന്‍ സ്റ്റഡി സെന്ററിന്റെ ആഭിമുഖ്യത്തില്‍ പ്രിയദര്‍ശിനി ഹാളില്‍ സംഘടിപ്പിച്ച കെ. കരുണാകരന്‍ ജന്മശതാബ്ദി ആഘോഷത്തില്‍ ലീഡറെ സ്മരിക്കുകയായിരുന്നു കുഞ്ഞാലിക്കുട്ടി. വിദ്യാര്‍ഥി രാഷ്ട്രീയത്തില്‍ വന്നകാലം മുതല്‍ തന്നെ അത്ഭുതപ്പെടുത്തിയ അദ്ദേഹത്തോടൊപ്പം പിന്നീട് പ്രവര്‍ത്തിക്കാനും കഴിഞ്ഞു. എല്ലാ സമുദായങ്ങളിലും ജനസമ്മതി നേടിയ നേതാവായിരുന്നു ലീഡര്‍. അദ്ദേഹത്തിന്റെ ശൈലി പിന്തുടര്‍ന്ന് ജനാധിപത്യചേരി ശക്തിപ്പെടുത്തേണ്ട കാലമാണിതെന്നും കുഞ്ഞാലിക്കുട്ടി വ്യക്തമാക്കി.