കോഴിക്കോട്: എസ്.കെ.എസ്.എസ്.എഫ് യു.എ.ഇ നാഷണല്‍ കമ്മിറ്റിയുടെ രണ്ട് ചാര്‍ട്ടേഡ് വിമാനങ്ങള്‍ ദുബൈ, റാസല്‍ഖൈമ എന്നിവിടങ്ങളില്‍ നിന്ന് 175 വീതം യാത്രക്കാരുമായി ഇന്ന് കരിപ്പൂര്‍ വിമാനത്താവളത്തിലെത്തുമെന്ന് സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങളും ജനറല്‍ സെക്രട്ടറി സത്താര്‍ പന്തലൂരും അറിയിച്ചു.
തുടര്‍ന്നുള്ള ദിവസങ്ങളിലും ആവശ്യാനുസരണം വിമാനങ്ങള്‍ ചാര്‍ട്ട് ചെയ്യുന്നുണ്ട്. റാസല്‍ഖൈമ, ദുബൈ, ഷാര്‍ജ, അബൂദബി എന്നീ എയര്‍പോര്‍ട്ടുകളില്‍ നിന്നും 17 വിമാനങ്ങള്‍ ചാര്‍ട്ടര്‍ ചെയ്യുന്നതിന് നടപടികള്‍ ഇതിനോടകം പൂര്‍ത്തിയായതായും ജൂണ്‍ 25ന് മുന്‍പായി അഞ്ച് വിമാനങ്ങളുടെ യാത്ര ഷെഡ്യൂളുകളും പൂര്‍ത്തിയായതായും എസ്.കെ.എസ്.എസ്.എഫ് യു.എ.ഇ നാഷനല്‍ കമ്മിറ്റി പ്രസിഡന്റ് സയ്യിദ് ശുഐബ് തങ്ങള്‍, ലീഗല്‍ ആന്റ് ട്രാവല്‍ വിഭാഗം ചെയര്‍മാന്‍ ഷിയാസ് സുല്‍ത്താന്‍, കണ്‍വിനര്‍ റസാഖ് വളാഞ്ചേരി എന്നിവര്‍ അറിയിച്ചു.
യു.എ.ഇ.യില്‍ കൊറോണ റിപ്പോര്‍ട്ട് ചെയ്യപ്പെട്ട ആദ്യഘട്ടം മുതല്‍ തന്നെ പ്രവാസികളെ കേന്ദ്രീകരിച്ച് എസ്.കെ.എസ്.എസ്.എഫ് വിവിധ ജീവ കാരുണ്യ പ്രവര്‍ത്തങ്ങള്‍ക്ക് നേതൃത്വം നല്‍കി വരുന്നുണ്ട്.