ന്യൂഡല്‍ഹി: രാജ്യത്തെ വിവിധ ഭാഗങ്ങളില്‍ കുടുങ്ങിക്കിടക്കുന്ന അതിഥി തൊഴിലാളികളെ 15 ദിവസത്തിനകം നാട്ടിലെത്തിക്കണമെന്ന് വീണ്ടും സുപ്രിം കോടതി ഉത്തരവ്. ഇതു സംബന്ധിച്ച് ജൂണ്‍ ഒന്‍പതിലെ ഉത്തരവില്‍ വ്യക്തത വരുത്തിയാണ് ജഡ്ജിമാരായ അശോക് ഭൂഷണ്‍, എസ്.കെ കൗള്‍, എം.ആര്‍ ഷാ എന്നിവരടങ്ങിയ ബെഞ്ച് ഇക്കാര്യം വ്യക്തമാക്കിയത്. 15 ദിവസത്തിനുള്ളില്‍ തൊഴിലാളികളെ നാട്ടിലെത്തിക്കണമെന്ന സുപ്രിം കോടതി ഉത്തരവ് നിര്‍ബന്ധമല്ലെന്ന് കര്‍ണാടക ഹൈക്കോടതി ഉത്തരവ് പുറപ്പെടുവിച്ചിട്ടുണ്ടെന്ന് തങ്ങള്‍ക്കറിയാമെന്നും എന്നാല്‍ തങ്ങളുടെ ഉത്തരവ് നിര്‍ബന്ധം തന്നെയാണെന്നും സുപ്രിം കോടതി വ്യക്തമാക്കി. ലോക്ക് ഡൗണില്‍ കുടുങ്ങിയപ്പോയ അതിഥി തൊഴിലാളികളുടെ പ്രശ്‌നങ്ങളുമായി ബന്ധപ്പെട്ട് സ്വമേധാ രജിസ്റ്റര്‍ ചെയ്ത കേസ് പരിഗണിക്കുകയായിരുന്നു സുപ്രിം കോടതി. 

സുപ്രിം കോടതിയുടെ ഉത്തരവ് ഇതുവരെ പാലിക്കപ്പെട്ടില്ലെന്ന് മുതിര്‍ന്ന അഭിഭാഷക ഇന്ദിരാ ജയ്‌സിങ് കോടതി മുന്‍പാകെ ചൂണ്ടിക്കാട്ടി. കുടിയേറ്റത്തൊഴിലാളികളെ കൊണ്ടുപോകാന്‍ ട്രെയിനുകള്‍ക്ക് അപേക്ഷിക്കേണ്ടത് സംസ്ഥാനങ്ങളുടെ ചുമതലയാണെന്നും അപേക്ഷ ലഭിച്ച് 24 മണിക്കൂറിനുള്ളില്‍ ട്രെയിന്‍ അനുവദിക്കാറുണ്ടെന്നും സോളിസിറ്റര്‍ ജനറല്‍ തുഷാര്‍ മേത്ത പറഞ്ഞു. ഇതിനിടെ നാഷണല്‍ ലോ സ്‌കൂള്‍ ഓഫ് യൂനിവേഴ്‌സിറ്റി പൂര്‍വവിദ്യാര്‍ഥി യൂനിയനു വേണ്ടി ഹാജരായ മുതിര്‍ന്ന അഭിഭാഷകന്‍ ഗോപാല്‍ സുബ്രഹ്മണ്യം അതിഥി തൊഴിലാളികളോട് പണം വാങ്ങിയാണ് ട്രെയിന്‍ സര്‍വിസ് നടത്തുന്നതെന്ന് കോടതി മുന്‍പാകെ അറിയിച്ചു.