വാണിമേല്‍: തുടര്‍ച്ചയായി പാഴ്‌വാക്കുകള്‍ നല്‍കി വിദ്യാര്‍ഥികളെ പറ്റിക്കുന്ന അധികാരികള്‍ക്കെതിരേ നാദാപുരം ഗവണ്‍മെന്റ് കോളജ് യു.ഡി.എസ്.എഫ് കമ്മിറ്റിയുടെ വ്യത്യസ്തമായ ചാക്കിലെഴുത്ത് സമരം ശ്രദ്ധേയമാവുന്നു.
അധികാരികളുടെ വാക്കും പഴയ ചാക്കും ഒരു പോലെ എന്ന് സൂചിപ്പിക്കുന്ന സമരം. പൂര്‍ണ സജ്ജമായ പുതിയ കെട്ടിടത്തിലേക്ക് കോളജ് മാറ്റണമെന്നാവശ്യപ്പെട്ട് വിദ്യാര്‍ഥി സമരം നടക്കുമ്പോഴെല്ലാം വെള്ളത്തില്‍ വരച്ച വരപോലെ ഉറപ്പുകള്‍ നല്‍കുകയും അതിനുവേണ്ടി നടപടികള്‍ കൈക്കൊള്ളാതിരിക്കുകയും ചെയ്യുന്ന എം.എല്‍.എ ഉള്‍പ്പെടെയുള്ള അധികാരികള്‍ക്കും വിദ്യാര്‍ഥി പ്രക്ഷോഭങ്ങളെ ഒറ്റുകൊടുക്കുന്ന മറ്റ് ഭരണാനുകൂല വിദ്യാര്‍ഥി സംഘടനകള്‍ക്കും എതിരാണ് ഈ സമരമെന്ന് വിദ്യാര്‍ഥി നേതാക്കള്‍ പറഞ്ഞു. യു.ഡി.എസ്.എഫ് കണ്‍വീനര്‍ അശ്വിന്‍ ഉദ്ഘാടനം ചെയ്തു. ചാക്കിലെഴുത്ത് സമരത്തില്‍ ഹിജാസ് അധ്യക്ഷനായി. അരുണ്‍ മധുസൂദനന്‍, ആഫീഫ്, ജംഷിദ്, നിയാസ്, തമീം, ജുനൈദ, ആജിഷ എന്നിവര്‍ നേതൃത്വം നല്‍കി.