അമ്പലപ്പുഴ: അമ്പലപ്പുഴ ശ്രീകൃഷ്ണസ്വാമി ക്ഷേത്രത്തിലെ നഷ്ടപ്പെട്ട ആഭരണങ്ങള്‍ കണ്ടെത്താന്‍ ദേവസ്വം കമ്മിഷണര്‍ അന്വേഷണത്തിന് ഉത്തരവിട്ടു. കഴിഞ്ഞദിവസം ക്ഷേത്രത്തിലെ തിരുവാഭരണങ്ങളില്‍നിന്ന് നവരത്‌നങ്ങള്‍ പതിച്ച മുഖം, മാറ്, മാല എന്നിവ നഷ്ടപ്പെട്ടിരുന്നു. ഭക്തര്‍ നേരിട്ടറിയിച്ചതിനെ തുടര്‍ന്ന് ഇന്നലെ ദേവസ്വം കമ്മിഷണര്‍ സി.പി രാമപ്രസാദ് ക്ഷേത്രത്തിലെത്തിയിരുന്നു. സ്ഥിതിഗതികള്‍ വിലയിരുത്തിയശേഷമാണ് അന്വേഷണത്തിന് ഉത്തരവിട്ടത്. ദേവസ്വം തിരുവാഭരണം കമ്മിഷണര്‍ എസ് പാര്‍വതിക്കാണ് അന്വേഷണ ചുമതല. നാറ്റാണ്ടുകള്‍ പഴക്കമുള്ളതാണ് ആഭരണങ്ങള്‍. കഴിഞ്ഞ പതിനാലിന് ആഭരണങ്ങള്‍ പുറത്തെടുത്ത് ക്ഷേത്രം മേല്‍ശാന്തി കേശവന്‍ നമ്പൂതിരിക്ക് കൈമാറിയതായി അഡ്മിനിസ്‌ട്രേറ്റര്‍ മുരുകേശന്‍ പറഞ്ഞു. എന്നാല്‍ ഇത് തിരിച്ച് നല്‍കിയില്ലെന്നാണ് ആക്ഷേപം.
സംഭവത്തെ കുറിച്ച് പൊലിസും അന്വേഷണം ആരംഭിച്ചതായി അറിയുന്നു. അതേസമയം ആഭരണം മോഷണം പോയതാണോയെന്ന് പറയാന്‍ കഴിയില്ലെന്നും അന്വേഷണം ആരംഭിച്ചിട്ടേയുളളുവെന്നും കമ്മിഷണര്‍ പറഞ്ഞു.