കല്‍പ്പറ്റ: കൂടുതല്‍ തൊഴില്‍ സജ്ജരായ യുവജനങ്ങളെ വാര്‍ത്തെടുക്കുകയെന്ന ലക്ഷ്യത്തോടെ ഐക്യരാഷ്ട്രസഭ പ്രഖ്യാപിച്ച ലോക യുവജന വൈദഗ്ധ്യ ദിനാചരണത്തിന്റെ ഭാഗമായി കുടുംബശ്രീയുടെയും അസാപിന്റേയും നേതൃത്വത്തില്‍ വിവിധ പരിപാടികള്‍ സംഘടിപ്പിക്കും. ഇന്ന് രാവിലെ 10.30ന് കല്‍പ്പറ്റ ബസ് സ്റ്റാന്‍ഡ് പരിസരത്ത് നിന്നാരംഭിക്കുന്ന വാക്കത്തോണ്‍ സിവില്‍ സ്റ്റേഷനില്‍ സമാപിക്കും. കലക്ടറേറ്റ് പരിസരത്ത് 10 മീറ്റര്‍ നീളത്തില്‍ സജ്ജമാക്കുന്ന ക്യാന്‍വാസില്‍ സമൂഹ ചിത്രരചനയും സംഘടിപ്പിക്കും. ദിനാചരണത്തിന്റെ ഭാഗമായി ഹൈസ്‌കൂള്‍ വിദ്യാര്‍ഥികള്‍ക്കായി നടത്തിയ പെയിന്റിങ് മത്സരത്തില്‍ പുല്‍പ്പള്ളി വിജയ ഹൈസ്‌കൂളിലെ വൈഷ്ണവി രമേഷ് ഒന്നാം സ്ഥാനവും നടവയല്‍ സെന്റ് തോമസ് ഹൈസ്‌കൂളിലെ താരസ് ബാബു രണ്ടാം സ്ഥാനവും നേടി. ഡി.ഡി.യു. ജി.കെ.വൈ പരിശീലനാര്‍ഥികളുടെ വിഭാഗത്തില്‍ ഇ.ജെ ജൈത്ര, വി വിബിഷ എന്നിവര്‍ ഒന്നും രണ്ടും സ്ഥാനവും ഡിജിറ്റല്‍ പെയിന്റിങ് മത്സരത്തില്‍ എ.വി ആര്യശ്രീയും സമ്മാനം നേടി.