തിരുവനന്തപുരം: ലോകം മഹാമാരിയെ നേരിടുമ്പോള്‍ പത്തുചക്രം ഉണ്ടാക്കാന്‍ ഇറങ്ങിപ്പുറപ്പെട്ടവരുടെ ജാള്യതയാണ് മുഖ്യമന്ത്രിയുടെ പ്രതികരണത്തിലൂടെ കണ്ടതെന്ന് പ്രതിപക്ഷ നേതാവ് രമേശ് ചെന്നിത്തല. കാര്യങ്ങള്‍ കൈവിട്ടുപോകുമെന്നുകണ്ട മുഖ്യമന്ത്രിക്ക് സ്ഥലജല വിഭ്രാന്തിയാണെന്നും മുഖ്യമന്ത്രി സൈബര്‍ ഗുണ്ടകളുടെ നിലവാരത്തിലേക്ക് താഴാന്‍ പാടില്ലായിരുന്നെന്നും ചെന്നിത്തല വാര്‍ത്താസമ്മേളനത്തില്‍ പറഞ്ഞു. കൊവിഡ് കാലം സുവര്‍ണാവസരമായിക്കണ്ട് അഴിമതി നടത്താനാണ് സര്‍ക്കാര്‍ ശ്രമിച്ചത്. അഴിമതി കണ്ടില്ലെന്നു നടിക്കണമെന്ന് കൊവിഡ് മാര്‍ഗനിര്‍ദേശങ്ങളില്‍ പറയുന്നുണ്ടോയെന്നും ചെന്നിത്തല ചോദിച്ചു.
കൊവിഡ് പ്രതിരോധത്തെ തുരങ്കം വയ്ക്കാനല്ല അതിന്റെ മറവിലുള്ള അഴിമതികളെ തുരങ്കം വയ്ക്കാനാണ് പ്രതിപക്ഷം ശ്രമിച്ചത്. യോജിച്ച് പ്രവര്‍ത്തിച്ചപ്പോഴെല്ലാം ഒറ്റയ്ക്ക് ക്രെഡിറ്റ് കൈയടക്കാനാണ് സര്‍ക്കാര്‍ ശ്രമിച്ചത്. യോജിപ്പിനുള്ള അന്തരീക്ഷം നഷ്ടപ്പെടുത്തിയത് മുഖ്യമന്ത്രിയും സര്‍ക്കാരുമാണ്. ഓരോ ഘട്ടത്തിലും സര്‍ക്കാര്‍ രാഷ്ട്രീയം കളിച്ചു. സര്‍ക്കാരിന്റെ വീഴ്ചകള്‍ ചൂണ്ടിക്കാണിക്കുകയാണ് പ്രതിപക്ഷത്തിന്റെ കടമ. കോടിക്കണക്കിനു രൂപയുടെ അഴിമതി തടഞ്ഞതിലുള്ള അമര്‍ഷം ഉണ്ടാകുക സ്വാഭാവികം. സ്പ്രിങ്ക്‌ളര്‍ അഴിമതി ആരോപണം പൊട്ടിയിട്ടില്ല. കേസ് കോടതിയിലാണ്. ഇതേക്കുറിച്ച് അന്വേഷിക്കാന്‍ നിയോഗിച്ച രണ്ടംഗ കമ്മിറ്റിയുടെ റിപ്പോര്‍ട്ട് പരസ്യപ്പെടുത്താന്‍ സര്‍ക്കാരിനെ വെല്ലുവിളിക്കുകയാണെന്നും ചെന്നിത്തല പറഞ്ഞു.
കൊവിഡ് പ്രതിരോധ പ്രവര്‍ത്തനങ്ങളുടെ സജീവമായ ഇടപെടലിന് പിണറായിയുടെ സര്‍ട്ടിഫിക്കറ്റ് പ്രതിപക്ഷത്തിന് വേണ്ട.സര്‍ക്കാര്‍ എത്ര ആക്ഷേപിച്ചാലും പരിഹസിച്ചാലും കൊവിഡ് പ്രതിരോധ പ്രവര്‍ത്തനങ്ങളില്‍ യു.ഡി.എഫ് മുന്നിലുണ്ടാകുമെന്ന് ചെന്നിത്തല പറഞ്ഞു.
പ്രവാസികളോടുള്ള ക്രൂരതക്കെതിരേയാണ് സെക്രട്ടേറിയറ്റിനു മുന്നില്‍ സമരം നടത്തിയത്. സമരത്തിനെതിരേ വളരെ തരംതാണ പരാമര്‍ശമാണ് മുഖ്യമന്ത്രി നടത്തിയത്. മാസ്‌ക് ധരിക്കാതെ കൊലക്കേസിലെ പ്രതി അടുത്തിടെ ഒരു കല്യാണത്തില്‍ പങ്കെടുത്തു. നിയമം എല്ലാവര്‍ക്കും ബാധകമല്ലേയെന്നും ചെന്നിത്തല ചോദിച്ചു. പ്രവാസികളോട് സര്‍ക്കാര്‍ തുടരുന്ന അവഗണനയില്‍ പ്രതിഷേധിച്ച് 25ന് യു.ഡി.എഫ് പ്രവര്‍ത്തകര്‍ 140 നിയമസഭാ മണ്ഡലങ്ങളിലും കൊവിഡ് മാനദണ്ഡങ്ങള്‍ പാലിച്ച് സത്യഗ്രഹം നടത്തുമെന്ന് ചെന്നിത്തല പറഞ്ഞു.